眾新聞 Logo
眾新聞 CitizenNews
眾聞

【728暴動罪】還柙青年獄中信:因疫情停議員探訪、停球類運動,感受如「食韓燒但唔畀火你」


去年7月28日,有44人被指在上環干犯暴動罪,今年25歲的阿均(化名)是其中一位。今年5月尾,他於庭上表示擬認罪並要求取消保釋,至今已還柙逾3個月。眾新聞請他講講近況,也問及他對立法會議員去留的想法。他提起7月下旬開始,議員的公務探訪因疫情而暫緩,不解為何律師和警員探訪卻如常。還有一項新措施:禁球類運動,阿均形容:「掟你落個球場唔俾波你,個感受應該同掟你落去食韓燒放題但唔畀火你咁—你都可以食吓泡菜嘅…」

他又指,當發現有確診者接觸過所員後,所員會被送往懲教院所內的醫院隔離,並接受病毒檢測,其餘同期數的所員就在自己倉內隔離,「冇得探訪再加上幾乎全日要留喺幾十呎嘅牢房裡面,又熱又焗空氣唔流通仲要對住個冇蓋嘅廁所之餘,其實對精神上嘅健康亦唔好受......不幸中嘅小幸,兩日後就收到佢地陰性結果,可以如常坐監。」 

相關文章:25歲青年承認暴動罪:牆外比牆內,更沉重難過

阿均寫的獄中來信。

隨住武漢肺炎疫情反覆,港人生活不得安寧,停糧停選不停工,皆因錢作怪。正當外面風雨飄搖之時,牆內世界亦有啲變化,我盡量形容下。

講講懲教嘅防疫措施,自從有大律師七月頭公務探訪過後於7月19、20號左右確診,我哋終於每日獲發一個CSI口罩,之前係每日一個eco乜乜大陸牌子,好易斷嗰隻。懲教固然有呼籲所員戴口罩,但最需要戴口罩嘅係職員同公務探訪人士,因為只有佢哋會接觸外界。現時仍然有兩成左右職員會除低口罩,多見於員佐級職員。當發現有確診者接觸過所員後,該所員已被送往懲教院所內的醫院隔離,並接受病毒檢測。而其餘同期數之所員則被鎖入自己倉內隔離,不得外出,亦即係冇得做運動同埋探訪,直至有檢測結果為止。

冇得探訪再加上幾乎全日要留喺幾十呎嘅牢房裡面,又熱又焗空氣唔流通仲要對住個冇蓋嘅廁所之餘,其實對精神上嘅健康亦唔好受,畢竟唔知要鎖到幾時,係無了期嘅等待。而不幸中嘅小幸,兩日後就收到佢哋陰性結果,可以如常坐監。

自七月下旬,議員嘅公務探訪以防疫為由被無限暫緩,弔詭嘅係律師及警察可以如常探訪,未知病毒係咪涉嫌職業歧視?抑或律師警察免疫力高啲?公務探訪本身已經有透明膠板阻隔住會面雙方,而且雙方均戴住口罩。如果咁樣都有衛生隱憂,似乎所有社會活動都應該要暫停。

除咗口罩、隔離、公務探訪之外,仲有一樣防疫措施就係禁止球類活動。我哋仍然可以喺球場做運動,可以跑步、做體能、吹水、甚至睇報紙都得,就係唔俾做球類運動。康文署關閉康樂場所,係因為聚集做運動嘅人嚟自五湖四海,有造成交叉感染嘅可能。反之我哋喺牆內,食瞓開工沖涼打波都係同一班人,唔明點解偏偏針對球類運動?掟你落個球場唔俾波你,個感受應該同掟你落去食韓燒放題但唔畀火你咁——你都可以食吓泡菜嘅…

中伏,喺監房講起韓燒,寫吓其他嘢分散吓注意力先。

近排人大開恩,俾返四位DQ議員留任,社會上為議員應否留任眾說紛紜。雖然我對立法會冇乜期望,但我都係會投票,但縱使我會投票,我都唔認為以既定人馬留任多一年有乜用。留任的話可以保留議員身份同資源,但對於政府議案、議員議案、政改方案,留任與否都冇決定性影響,倒不如轟轟烈烈杯葛選舉,向世界表達香港立法會嘅荒謬,唔好再俾假希望香港人啦。要記得,係港府同人大借疫情為由串謀延後選舉,利用他人嘅不幸謀取利益,係幾十條人命嘅人血饅頭。戴返個頭盔,政治呢家嘢我真係識條鐵,純粹想岔開下等自己遺忘個韓燒……

至於我嘅近況呢,不過不失,身心健康,幾乎日日都有人拜我山(即指探訪,我啊媽話唔鍾意拜山呢個術語,但我幾鍾意,夠傳神!)近排信件的確因為疫情關係延遲唔少,八月十二日先收到七月尾嘅信,不過明嘅。快啲嚟啦,雲中錦書!

後補一、
對於立會去留,唔應該花心力去爭論太多,反正去留都對抗爭冇乜幫助。但我說服唔到自己——若果原班人馬留任於制度內有用,點解舊年六一二要圍立法會?

後補二、
請各位筆友,尤其係入世未深嘅女筆友,唔好以為「衰黃絲」[1]坐監嘅就係抱有理念嘅正人君子,切勿輕信紙上情緣!估計有兩成被當做「黃絲」嘅都接唔到遊行口號,或者唔知「煲底」係乜,請唔好見神就拜,小心保護自己 (呃感情,實在睇唔過眼)!

阿均
二零二零年八月十三日

註1:「你衰咩入嚟」那個「衰」的意思




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe