眾新聞 Logo
眾新聞 CitizenNews
眾說

香港有個真理教


講起「真理教」,有返三四十歲以上的香港人都應該會聯想到一位披頭散髮的日本阿叔,但今日講的不是日本,是香港也有個真理教。

這個香港真理教,教主是位外觀很典型的師奶,幹部還有多位眼鏡毒男(不信自己上行會網頁睇吓幾多高官戴眼鏡),信徒主要為上流和下流社會人士,根本教義是「老細就是真理:老細一開口,無論任何話語都會成為天地真理。所以,即使香港行之有效N年,不論政府、高官、法官都話有三權分立,老細開句聲就眨吓眼冇咗,快過美源髮彩,仲要可以改變過去,原來香港從來都沒有三權分立。有人同我講開,話最近的12子送中事件,港苦不是應該有機制可以跟進的嗎?我就話,你都傻嘅,三權分立都可以即刻冇咗啦,咩機制who cares? 

香港真理教教主和幹部們.

其實,師奶教主這種行徑,以往都已見到端倪。例如數年某位內地護髮來港講解上面對香港政改立場,師奶教主即化身巫女,奉之為神喻,說可以為香港政改「一錘定音」。當時筆者就諗,嘩一個護髮都可以為香港一錘定音,大陸咪幾千幾萬個阿水都可以為香港一錘定音?但唔好理,香港真理教的「老細就是真理」主義,就是如此,兼且老細的定義範圍好廣,不只習總,阿小明、饒護髮、仲有唔知幾品的芝麻小人物都係佢老細,講的都是天地真理,佢開口你要聽。

還有阿教主係不容你反駁的。只要你反駁佢, 即使你係大律師甚至法律教授,都會被定性係唔識法律。另一招興用,就話你冇熟讀文件。又或者話你政治化,而佢唔識政治(儘管做咗四廿年AO/高官),所以唔同你講咁多(好似得香港會咁多政治人物爭住認自己唔識政治)。另外仲有多種封印術,例如話你無聊、不切實際、唔理性、waste time,咁就唔洗再傾,成個辯論被封印了。

香港真理教另一特點,係無排他性,即信徒可同時信仰其他宗教。例如某執葉教徒就又信耶穌又信觀音又信阿爺。師奶教主也是自稱天主教徒,且經常看到天主顯靈,例如叫佢參選特首,話天堂留咗位比佢,又不時神打,聖母定慈母上身,悲天憫人,甚至憫物,關心入閘機多過年輕人。咁唔知阿師奶教主覺得聖經定行政主導真理一啲?當然係行政主導真理過聖經啦,因為耶穌唔係佢老細嘛。最近天主教會好似都開始教人愛國,逐漸融入真理教同大陸的愛國教會,所以可能都不用分那麼細,大家都是中國人。

話說香港真理教的教主和好多幹部都是高材生,原來日本真理教也是,多位幹部都是東大、 早慶等日本名校的畢業生,甚至醫科理科博士都有。諗落都係, 不然怎麼有能力自己製作毒氣這麼厲害呢?香港真理教嘛, 毒氣似乎不識造,但毒害人民方面,能力恐怕有得一拼。( btw日本N年前有位女星真的叫「天地真理」咁把炮, 不過現在已是位阿婆,有興趣自己google)


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe