眾新聞 Logo
眾新聞 CitizenNews
眾說

與民為敵手法層出不窮


7月1日至今三個月,國安法、禁示威、打傳媒、批法官、十二子、 秋後算帳醫護教師、公務員宣誓效忠、取消三權分立...... 雖然已經發生很多事了,但政權與民為敵手法依然層出不窮, 鑊鑊新鮮鑊鑊甘,最新連一個授勳名單都可以激瓜你。

陳百祥獲授銅紫荊星章。

講的,當然就是「荷蘭叻」陳百祥都獲得「荷蘭水蓋」。 不知有幾多人看了政府公告,是這樣形容他的:

陳先生熱心社會公益,多年來積極支持和參與慈善籌款節目,貢獻良多,充分表現其無私與仁愛的心,也是促進社會和諧與溝通的良好榜樣。陳先生在演藝界的成就傑出,對工作投入及專業的態度是新一代演藝人的模範。 現獲頒授銅紫荊星章。

我想嘔呀jpg。首先, 佢去慈善籌款節目係因為嗰個係佢份工嚟㗎,唔係佢菩薩心腸呀。 跟住,佢呢幾年不斷舔政府、口講理性實情唔講道理、歪理不盡捩橫折曲、鬧後生人係廢青、話警察應該開槍、上節目一味冇pt鬥大聲,係人都知係破壞社會和諧、 妨礙溝通的最強反面教材,你就叫佢良好榜樣。咁大家明政權成日話會和諧溝通時,心裡諗緊的榜樣係點啦。演藝界成就,就係一味玩cheap玩低級趣味玩足幾十年。sorry講錯,因為佢根本唔好笑,冇趣味,純粹低級,又cheap又low,然後你話咁樣係專業。 唔好侮辱成個演藝界啦。

不過,有網民就提起已故填詞人林振強評荷蘭叻曰: 「任何電視節目,只要見阿叻有份出現,你就知道, 這個節目必會變為業餘、不認真,和像馬戲團。」 我睇見後都即刻放鬆下來。因為成個授勳,不就係一場馬戲嗎? 只係區區一場政治酬庸、分豬肉獎嗎?有幾多獲獎人係公眾真係會認同對社會有貢獻的?當「大口狗」 都可以拎到「最高榮譽」大紫荊獎,無數落選保皇區議員都拎到安慰獎的榮譽勳章,何必要為依個所謂授勳制度認真?

梁君彥獲授大紫荊勳章。

林氏又云:「他可以獨力改變一個電視節目的質素...... 以一人之力,左右一個騷,或一件盛事(的質素)」所言甚是。 藉著參與,荷蘭叻以一人之力將成個授勳制度整cheap同low晒,不簡單。甚至乎,如果可以藉此暴露整個政權同成班保皇黨幾cheap同low, 幾荒唐可笑,可能都算是一種貢獻。善哉善哉。 最後,就算只係精神勝利佔人便宜法,以後見到這些所謂社會賢達都可以咁講:「我真係恭喜你拎到勳章呀,同阿叻一樣咁叻呀你!」


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe