眾新聞 Logo
眾新聞 CitizenNews
眾說

宣道同學起來!


註:筆者為香港九龍塘基督教中華宣道會轄下小學舊生

 

「船到痛鶴氣LOI!」

大家立定心志!努力學業,充實自己,聖經訓言常記。宣道小學校歌

當此惡勢力橫行嘅時間,等我哋嚟重溫一個小學時學過嘅聖經故事,充實下自己啦。老老實實,學校就嚟連呢啲聖經故仔都俾人禁埋,冇得聽㗎喇。

圖片來源:小羊聖經有聲書《但以理的故事》第二集《火窯和金像》
 

話說古時有個巴比倫王名叫尼布甲尼撒,係一個好巴閉嘅王帝。有幾巴閉?有次佢叫人幫自己整咗個成八層樓咁高嘅巨大黃金像,然後叫齊政府入面啲奴才包括首長、太監、信差、司局長、議員、師爺、各級官員等等出嚟,可能都包括埋啲宗教領袖同老師呀嗰啲啦,總之要冚世界一聽到国歌奏起就立即要俯伏向金像下跪以表忠誠,同而家見到支咁核突嘅乜乜旗要立正差唔多啦。佢仲立咗條宇宙大法,任何人如果唔跪,就要掟落火坑,「依法」懲處咁話。

大帝一吹雞,全人類跪低;點知但以理有三個 friend 偏偏好硬頸唔肯跪,挺直腰骨楝喺度,因為佢哋只會向自己所相信嘅神下跪咁話。呢個時候有啲藍絲家長就爭住走出嚟篤灰,同大帝講:「吾王萬歲!我王講過話一聽見国歌響起,無論做緊乜都要向住你個金像跪低,凡唔肯跪嘅就要動用宇宙大法定罪;偏偏有幾個猶大人唔放吾王喺眼內,死都唔肯跪喎!嗱,就係佢哋三個!夠膽唔聽你支笛,唔信你嗰套,簡直當你冇到!一定要將佢哋依法處置,掟落火坑,殺一儆百!」

大帝知道後梗係嬲到震,竟然有人膽敢挑戰祖国嘅權威?於是叫咗佢哋三個人嚟再問一次:「你哋究竟跪唔跪?最後機會。如果死都唔聽話,唔好怪我掟你哋落火坑咧。」點知呢三條友竟然仲寸寸貢咁答:「我哋做乜要答你呢啲廢問題?你鍾意點樣由得你,就算你掟我哋落火坑,我哋嘅神都會救番我哋出嚟。」

「但係就算我哋嘅神唔嚟救我哋,你都應該知道,我哋唔會跟住你指鹿為馬,亦都唔會聽你支笛!慳啲啦你!」

大帝見佢哋唔合作,仲咁寸咀,嬲到震啦顏面何存呀?於是佢叫人將個火坑加熱多七倍,驚死燒佢哋唔死,然後綁起呢三個唔識時務嘅真猶大人再踢入火坑。呢個時候奇怪嘅事發生咗,就係佢哋三個竟然燒唔著(?!),個火坑裡面仲好似有第四個人喺度同佢哋遊花園,唔通係天使嚟?!大帝走近個火坑望望吓,覺得唔對路,始終佢都驚天堂唔留位俾佢㗎嘛!於是佢叫番嗰三個真猶大人出嚟,仲轉軚話佢哋三個嘅神先係真正嘅神添。

呢個故事教訓我哋,現實中雖然嗰啲唔信神嘅人好多時都作威作福,但做人都應該要俾啲腰骨,有嗰句講嗰句,堅持唔好做嗰啲違背良心嘅事。就算面對要俾人踢落火坑嘅下場,都唔應該為咗生存而輕易放棄做人嘅原則同尊嚴,指鹿為馬。

各位宣道嘅同學仔,師長講嘅故仔真係有啲道理㗎。

延伸聆聽/行動:

故事來源:但以理書第三章
一人一信:要求教育局撤回取消教師註冊決定
教協眾籌幫被釘牌教師司法覆核


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe