眾新聞 Logo
眾新聞 CitizenNews
眾說

張宇人,正燈神


張宇人議員,唔好意思,又要攞番你一個月前嘅說話出嚟分享。一個月前你鬧張竹君扮專家,不懂得計算風險,皆因當日政府放寬部分防疫限制措施,但卡拉OK和酒吧仍重開無期。張宇人提議監管客人在拿起酒杯喝酒時才拉低口罩,其餘時間保持佩戴,以讓酒吧業界盡快復業,衞生防護中心傳染病處主任張竹君則質疑,口罩「除除戴戴」可能比不戴更危險。

立法會飲食業界議員張宇人;爆出多宗確診病例的China Secret酒吧。照片來源:香港電台照片/網上照片

事隔一個月,香港武漢肺炎疫情真係一波未平,一波又起。今個月疫情其中一個爆發地點就係尖沙咀China Secret酒吧,其他相關案件牽涉地方更包括尖沙咀豪麗大廈,還有昨日宣布要暫停營業、之前同一集團其他酒店向醫護人員下封殺令的尖沙咀帝苑酒店。張宇人果然係現代燈神,一個月前提起酒吧就鬧爆張竹君,一個月後一間酒吧成功攬炒香港,更加攬炒出賣香港人的酒店集團。

還不到一個月前,張議員鬧張醫生扮專家,不懂計算風險。

究竟張竹君係咪扮專家,天知地知你知我知,張竹君醫生任職衞生防護中心傳染病處主任,履歷包括香港中文大學預防醫學碩士、英國皇家內科醫學院公共衞生科院士、香港社會醫學學院院士及香港醫學專科學院院士(社會醫學),就算唔係袁國勇水平,至少學歷得到香港和英國官方機構認可,絕對唔係「執葉」水準。事實勝於雄辯,一間酒吧成功令張宇人榮登2020燈神榜第一名,飲食業界繼續勒緊褲頭、酒店業界繼續要服務公主KOL、旅遊業界見唔到旅遊氣泡,只見到同事嘔白泡,全因為張竹君一早警告過會出事的酒吧成為新一個火頭。本來仲想叫張宇人來一趟酒吧challenge,叫張宇人試吓喺酒吧飲酒時候一戴一露,睇吓會唔會中招,現在不用了,因為酒吧群組再次出現。

兩日前張宇人倡再放寬酒吧、卡拉OK、夜總會營業時間和限坐人數,包括由午夜12時放寬至凌晨2時,限坐兩人放寬至4人。究竟下一波疫情會否出現卡拉OK和夜總會群組呢?只可惜馬會冇得俾大家投注,如果唔係我一定 all in 買卡拉OK和夜總會會成為疫情另外兩個大火頭,因為 In Tommy, we trust!


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe