眾新聞 Logo
眾新聞 CitizenNews
眾聞

台北「保護傘」被潑糞料休業5日 員工受訪:共產黨我哋都唔驚,唔會驚小粉紅


為流亡港人提供工作的台北餐廳「保護傘」周五(16日)遭人潑糞,當地警方在案發後48小時內已拘捕4名疑犯,包括1名疑收錢行事的男子、3名疑教唆犯事的人。保護傘全部員工這兩日都在幫忙清理善後,事發當時在餐廳工作的阿水(化名)周六晚收工後接受眾新聞訪問。他說,所有廚具、爐具都要換過,場地要消毒。問到會否擔心再被騷擾,他說:「我哋手足梗係唔驚,哈哈。好認真講句:共產黨我哋都唔驚,唔會驚小粉紅。係驚佢哋跑得快啫。」他預料下周二可以恢復營業。

保護傘周五遭潑糞,全店要大清潔。保護傘Facebook照片

保護傘周六晚上亦都在Facebook貼文,指有員工「髒物入眼,延醫求治」,而餐廳一直緊守各項法例,無收過任何投訴或當局指示,認為肇事者預謀及别有用心之中傷言詞,令人齒冷,「在此艱苦抗争路上,能與諸君共事共勉,實乃吾等之榮。」

貼文附圖並有幾幅「家書」,是由流亡當地的港人所寫,其中一封寫道:「多謝咁多位係香港繼續撐住香港,我知大家都無忘記過台灣手足,雖然隔住個海,但仍然心繫香港。場運動未完,係香港嘅各位要堅持,為台灣嘅手足出多一分力」。

保護傘Facebook貼出的其中一封「家書」。保護傘Facebook照片

潑糞事件發生在昨日(16日),受訪的阿水表示,當時是下午12點幾,餐廳有4、5檯客。正在工作的他突然聽到同事大喝一聲「喂!」阿水回過頭來,(開放式)廚房、同事身上已經都是雞屎。他形容潑糞人行動迅速:「我當時專心整緊嘢,我睇唔到佢嘅動作,佢係淋咗我、我先『咦,無啦啦身上有屎』。 跟住呆咗兩、三秒就追出去。佢潑完之後就走,好可惜被佢走甩咗。」

阿水指,對方全身黑衫,只見到是瘦的。「我自己就唔清楚佢點解咁做,我自己盤算就,因為前兩日啱啱好(開鋪)半周年。」台灣警方現已拘捕4名疑犯,令阿水覺得台警效率好高,他本來以為疑犯走甩了就好難捉到。

疑犯被閉路電視影到,提著裝滿雞屎的膠桶進入店內。

阿水表示,開業半年首次遇到這種騷擾。問到他們幾個員工會否擔憂之後再被騷擾,他笑說:「我哋手足梗係唔驚,哈哈。好認真講句:共產黨我哋都唔驚,唔會驚小粉紅。係驚佢哋跑得快啫。」他又指,不會加強保安之類的,現時店內外都有閉路電視,可以做的只是多留意攜大型物件進店的人士。

至於保護傘的營運本身,阿水形容是不錯的。餐廳最初主打義大利麵,但漸漸發現台灣人比較受落的是菠蘿包、沙嗲牛麵、燒味。菠蘿包和燒味都是由當地香港人供貨,用正宗港式配方。

工作不成問題,阿水現在擔心的是簽證:「我哋嚟台灣唔係求讀書、求工作,身份係個問題,我哋(香港)Passport 過咗期之後就乜都唔係,係無身份嘅人。」他透露,在台求學的流亡港人,完成大學學位後留台5年可以獲得台灣人身份,問題相對易處理,但單靠工作簽證的話,其實相當擔心香港護照過期後,台方怎樣處理簽證問題。

以下是保護傘Facebook貼出的幾封「家書」:

保護傘Facebook照片
保護傘Facebook照片
保護傘Facebook照片
保護傘Facebook照片



請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe