眾新聞 Logo
眾新聞 CitizenNews
眾說

國產七七七


【本故事純屬虛構,如有雷同,實屬巧合】

─金鐘─

光頭佬:「阿七,國家終於有任務比你啦,皇上叫你上深圳見佢呀!」

七七七:「好!等我即刻推晒咩施政報告嗰類唔等使嘢,上去見佢!」

─深圳─

照片來源:蘋果日報

巡按:「嚟得咁快,隨傳隨到,阿七你果然對國家忠心耿耿。」

七七七:「咁都係因為國家對我的恩情有如滔滔江水連綿不絕,又有如黃河泛濫一發而不可收拾。係呢巡按大人,唔知皇上搵我係有咩緊要事傾呢?係咪要捉黃痴瘋,定又有人要送中?」

巡按:「今次好簡單啫,陣間皇上演講,身後要有後宮佳麗三千做佈景板,依家仲爭隻腳,你嗱嗱臨去嗰邊個角落度填咗個位,就得㗎啦!」

七七七:「......就係咁樣?有冇機會同皇上寒暄幾句㗎?」

巡按:「阿七,你區區一個大灣區二線城市市長,地位仲低過深圳市長同中聯辦主任,正一九品芝麻官,皇上日理萬機,咁多事做,邊樹得閒同你寒喧呀,尤其你個人又咁悶都唔知有咩好寒喧。」

七七七:「之但係呢巡按大人,我上嚟之前響香港吹到今次好大件事㗎嘛,依家做陣佈景板,個位仲要冇雷公咁角落,就要返去,好瘀㗎喎!」

巡按:「你瘀唔瘀關皇上鬼事呀?家陣皇上鐘意叫你嚟就嚟,鐘意叫你扯就扯,係咁㗎啦,仲想點呀?仲唔謝恩,跟住彈開埋個角落度罰企?」

七七七:「...謝皇上...」


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe