任職小學社工的Mimi，發現讀小三兒子謙謙的書包內有一份體育科工作紙，要做一篇閱讀理解，文章提到「體操（Gymnastics）一詞，來源於希臘文 Gymnastike，最早由古希臘語演變而來。1896年首屆雅典奧運會設立了鞍馬、吊環、跳馬、單槓和男子雙槓比賽，直至1928年的奧運會才有女子比賽項目......」學生讀畢文章要回答選擇題。
Mimi看完之後不禁唉了一聲，「乜而家小三學生，要識拉丁文？乜而家上體育堂，唔係淨係跑來跑去而要做功課？」
謙謙就讀新界一間津校，Mimi記得：「覺得阿仔返學一年比一年吃力，小一時，佢間中會話唔想交功課，升小二、小三之後，開始瞓唔到覺，闔埋眼就見到好多功課。」謙謙有讀寫困難，到小三時很多科目都不及格，「我老公會叫佢努力啲，但小朋友可能覺得自信心受到打擊，有情緒焦慮，屋企三個人關係都會受影響。」
最難過，是Mimi從兒子身上，勾起了自己的童年創傷。
「我細個喺澳門長大，記得返學可以周圍跑來跑去，幫老師清潔校舍好好玩。小四來到香港之後，返學覺得好辛苦，唔單止成績追唔上，更唔明白點解上堂要坐定定守規矩。讀初中時變得好反叛，群埋一班食煙飲酒逃學嘅豬朋狗友，又無心機讀書，中三就被淘汰，之後去讀商科學校，會考只得一分，出來做文員，唔甘心就咁過一世，於是慢慢再讀夜校、再考會考、讀副學士，一步步做到社工。」
「每當我見到阿仔而家讀書咁辛苦，我都會諗番自己細個。我成日都會問，點解讀書唔可以開開心心？」
她決定企出來發聲，透個社區群組加入反對TSA的家長聯盟。今年3月，她帶兒子出席立法會兒童權利小組委員會會議。怕羞的謙謙，平日最怕與陌生人說話，他在會上最終鼓起勇氣說了這句：「我星期一有7樣功課、星期四有9樣功課，我想學校少啲功課。」Mimi說：「當日出席會議前，我同阿仔講：『你去到講又得、唔講又得，但今日我哋去立法會，係要表達自己嘅聲音。』最後佢自己決定要講。」
嘉諾撒聖家學校（九龍塘）校長邵苑芬，早前出席電台節目時批評反對派帶小朋友出席立法會旁聽會議，會上的粗暴言語及行動，例如駡議員駡局長，是很壞的教育、「荼毒小朋友身心」，不明白為何要帶小朋友到「是非之地、是非場面」，認為做法違背教育理念。
Mimi並不認同，「我聽到覺得好憤怒。小朋友有佢哋嘅權利表達意見，佢哋都有思想、有自由，點解我哋唔可以尊重佢哋。我覺得大人咁講好專橫，唔理小朋友感受。去立法會係關心社會，我哋係為咗改變制度，先行出呢一步。」她說，看到近年多名學童自殺的新聞，更覺得發聲非常重要。
她以往甚少參與社會運動，未試過七一上街，六四間中會去，雨傘沒有正式參與，並不是爭真普選的堅實黃絲，「我唔係政治上行得好前嗰種，我每日生活已經好忙，放工返屋企仲要煮飯湊仔，有時間都想同阿仔去玩吓或者休息吓。點解我要企出來，係因為我無其他方法，令政府改變教育制度，我見到好多家長同我一樣，都係流住眼淚過日子。」
40多歲的Mimi一家三口住居屋，要供兒子讀國際學校有經濟困難，若兒子要留在主流學校完成小學中學，她內心有很多憂慮，「我只有一個好卑微願望，就係我個仔讀書唔使咁辛苦。」她已決定讓兒子罷考今年BCA，不論BCA是否真的比TSA容易，她都不想兒子有壓力，只望兒子能快樂輕鬆，渡過一個愉快童年。
