本來在拔萃女書院任教通識科的楊子俊做了8年教師，今年是他首次不用開學的新學年。縱然離開了學校，他仍沒有放下他的教師身份，希望在體制外繼續他的教育路。
面對政權對教育的日漸收緊，老師被迫要閹割某些內容，楊子俊覺得，未來通識或變成一科考試科，或者更差的是，有機會變成政權藉以滲透國民教育的突破口，猶如國內的政治課。
面對制度內的無力，他提出「影子教育」的構想，希望在體制外教授學生應該要學的價值和內容。
離校之後 體制之外
今年新學年，楊子俊不用再清晨起床回學校，是輕鬆了，但也有點不習慣。雖然離開了學校，但他以另一種方式延續通識科老師這身份。今年的開學日，由他撰寫的通識參考書正式出版，算是一個象徵意義，「就係喺制度以外，點樣教到我心目中嘅通識。」
楊子俊教書期間，為了更自由地出版他撰寫的通識教科書，創立了山道出版社。離校後這幾個月，他投放更多時間在出版社，埋首準備剛出版的通識參考書《香港通識2020》。不過，明年的參考書未必保留到《2020》的全部內容了。
鑑於有通識教科書送審修訂後，他對於某些內容是否要保留，仍在思考中。「有機會如果我繼續Keep住某啲內容的話，學校係唔敢訂書，或者有啲學生就唔買你本書，都係生意上要考慮嘅地方。因為本身出書係希望幫到同學、盡量Reach到多啲學生，究竟點樣拎個平衡，呢個我暫時未有答案。」
其實楊子俊6月得知自己不獲續約後，不等到8月底約滿，反而選擇主動提早於7月辭職。選擇這樣做，是因為他覺得在體制之外，自己可能做的更多，也希望迫出破釜沈舟的感覺，令自己盡快利用暑假的空間做點甚麼。「我覺得抗爭運動有啲冷卻，要點樣盡快用到最後嘅餘暉，去做更多嘢。嗰兩個月考慮咗係咪參選立會、甚至幫人參選、自己做咗額外教材，亦睇返我喺運動入面有咩角色可以做。」
一定要跳出制度，冇咗個安穩，你先會迫自己去做呢啲嘢。因為本身老師係我最主要身份，而家冇咗學校環境，咁我係個咩人呢，喺尋找嘅階段，你就會迫自己做好多嘢。
他說，跳出制度之外，現在可以做一個爛頭卒的角色，「你繼續留喺教育界，當然可以繼續講嘢，但唔會講得咁勇、唔會講罷工嗰啲。我覺得係要有人去做，咁我就扮演呢個角色。」
紅線之下 鋼線之上
教育界近來風波不斷，通識科更是處於風眼。其實在楊子俊過去教書的8年間，他已經感覺到通識科起了很大變化。2012年開始教書時，他直言仍可感受到教學的自由，但自2013年有試卷討論議會拉布後，建制派開始對通識科有聲音，及後對通識的攻擊不時出現。不少同行在處理政治議題上都開始格外小心，至傘運後更嚴重。
到後來轉了校，他發現教材上很多批評政府的議題，已經不能再說，例如市區重建的議題，本來用囍帖街做例子，有年突然被移除，他估計原因與囍帖街正正由時任發展局局長林鄭月娥負責有關，避免像是揭林鄭瘡疤，故要改為藍屋做例子。「本身係好溫和嘅議題，但好似而家我哋唔可以再講一啲政府失敗嘅案例，好似覺得鬧政府係罪咁。」
通識科不時被攻擊，加上較為親近權力核心的學校高層，都早有計劃地取消初中通識科，老師都感到此科未來黯淡，「年年科主任都同我哋講，不如讀多啲書，可能考慮吓轉行、轉科，大家都唔知之後會發生咩事。」
當時作為體制內「一粒小薯」的楊子俊，一如大部分的老師，都乖乖地配合學校的大政策，各種審查都一一接受，只能盡教。
如果說過去紅線已隱約存在，今年這條紅線更是明目張膽地收緊。雖然已跳出體制，但楊子俊想像到，仍留在體制內的老師教學時面對很大的挑戰，「條紅線係摸唔透，唔知做到咩位置會出事，好似宣小老師咁，點知睇《鏗鏘集》都會出事，Suppose已經好Neutral(中立)，有啲位係估唔到，只能超級小心。」
就像他在準備下一本參考書時，有些內容他也感到掙扎，因不知該如何拿捏表達，例如法治、社會政治參與、港人身份認同等議題，也要很小心處理，「好多呢啲位都唔知會唔會講完後出事，所以我諗大部分老師嘅做法，就係唔講。」
憂通識為名 國教為實
當老師不敢教某些內容，會如何影響通識科將來的面貌？楊子俊覺得，可能會走向兩大方向。第一是淪為一個普通科目，「本身通識科係被喻為香港教育制度一個幾前衛的設計，課堂唔係填鴨式，會講社會議題。我都讀過通識，知道完全自由嘅通識科，先會令同學感到最大興趣，但當唔可以再探討啲貼身嘅社會政治類議題，可能只係拗風力發電嘅利弊，就會好悶，變到一科只係考試的科，唔會有興趣。」
第二個方向，是有機會會變成政權藉以滲透國民教育的突破位，變成類似內地的政治課，「通識六大單元之一係現代中國，政權一直以來都搵唔到位置，可以明目張膽咁推國民教育，但通識係突破位，因為我哋真係名正言順教中國嘅嘢。」
其實近年他已察覺有類似趨勢，一些親建制學校會用通識科的名目辦活動，例如國情問答比賽、內地交流團等，他以往任教的學校就曾以通識科活動的名目，舉辦過大灣區研習日。
另一邊廂繼續有人提倡要殺科，他覺得通識科未來命運如何？楊子俊認為，視乎老師「乖不乖」︰「我覺得佢哋乖嘅，如果我冇因為受傷，張揚咗政治立場，我都可能係其中一員。切身處地咁諗，你喺個制度入面，你就唔係好夠膽反抗。」有老師的配合，政權未必會殺死通識科，所以對於通識是否可以留低，他覺得是樂觀的。
不過，以這種方式留下，好嗎？他說，以他現時在制度之外、沒有包袱的位置來看，當然是不好。像他選擇教通識科，都是因為覺得自己教學不只是幫學生考試，而是幫助學生多了解社會，「但如果我心目中嘅通識科，都已經唔係本來嘅面目，咁仲有咩意思呢？」不過他也明白體制內的人面對的難處，如果他尚在制度中，都應該會繼續隨波逐流。
不只是通識科，楊相信整體教育作為三座大山之一，會是被針對的對象，未來教育亦會跟從中港融合的走向，「直到香港同內地教育、生活、傳媒睇齊時，先會收科。」
早前宣小老師被釘牌事件，他覺得對於像他這類有自己想法的老師來說打擊最大，「本來想喺細微細眼位做多啲嘢，但而家好似已經殺盡哂佢可以做到嘅空間，你做小小動作都會出事。」在此險惡的環境，他覺得老師要走下去，先要保護自己，但個人力量始於微弱，認為業界應該思考能否透過團結一致的力量，討論是否以工業行動作為突破點。
突破體制 影子教育
楊子俊說，自己過去是個很乖的教師，如非去年被催淚彈射傷，今天都不會這樣走出來。 不過，過去他仍在學校時，其實已在體制外行動。
楊子俊教書時，為校內同學製作了一本幫助溫習的參考書，後來因想將受眾擴闊給更多學生，更成立出版社，由2016年開始每年出版一本通識參考書，銷量每年有數千至近萬本。當時出版參考書，也是有感教學上受到箝制，但又不敢在校內「亂來」，於是就在校外用自己方式，實踐心中通識教育的模樣。「唔需要畀學校環境限制自己，你想對嗰行有貢獻的話，未必淨係做返自己工作，都有其他不同方式。」
見到而家香港教育明顯受教育局控制，我哋好難反抗，唯一可以反抗就係我哋喺制度之外可以做咩嘢。
楊子俊提出一套影子教育的構想，「喺21世紀，其實唔一定要靠本身嘅官方教育，學嘢唔一定限死喺學校入面。套用喺現時香港局勢，會唔會本身應該要教畀同學嘅價值或者內容，喺學校做不到，將佢擺喺課後做呢？」
他心目中的影子教育，是希望針對普遍的中學生，補足現時教育制度做不到的內容。而要吸引他們，就要考慮市場策略，他打算套用近似補習的概念，以協助應試作為包裝。「影子教育嘅體制，係價值先行。雖然可能都係補習 ，可能都係嗰啲考試技巧，但真正核心精神係想佢學習其他內容，一啲我哋覺得學生應該學嘅嘢，例如中文科最近CUT咗嘅六國論，或者遲啲可能移除嘅口試，呢啲係真係學中文嘅人應該要識。或者通識有啲議題，就算學校唔敢教，DSE都可能會出，咁同學點學呢，可能就靠學校以外嘅方式。」而形式方面，他的構想是未必如日校或補習社般，會較著重趣味性，應用新媒體內容。
作為計劃的第一步，他正考慮是否要免費公開他的通識教材，希望給學生之餘，亦讓公眾更了解通識科是甚麼模樣。他亦知道一些教育倡議組織正考慮製作一些公民教材，「Idea都差不多，既然政權唔畀我哋講，咪將一啲覺得應要教畀同學嘅嘢，將佢喺公民社會畀多啲人睇，都係好事。」
既然政權不斷控制教育，我哋唔可以喺學校做想做嘅嘢，就要將精力擺喺外面。佢想我哋好似教書機器咁，滿足佢版本嘅教育，我哋就諗多啲自己喺公民社會嘅責任。
離開學校後，他仍覺其教師身份仍在，「你當然可以放棄，唔理教育界嘅嘢，但始終自己一開始揀呢份工(教育)，係有啲想法，嗰個想法而家仍然未死。呢樣嘢一日存在，一日我可以做到，都係會Keep住自己喺呢行。 」
