眾新聞 Logo
眾新聞 CitizenNews
眾聞

【抗疫10個月】FB專頁「日日爆」收集失手劣食投稿 師奶疫情期間日日煮三餐壓力爆


受疫情困擾經已10個月,每個人都可能經歷過情緒不穩的時候,師奶們的煩惱卻總是容易被忽略。Sally(化名)本來是雙職媽媽,疫情期間改為全職煮飯,她很坦白說30幾歲人才學煮飯,連蕃茄炒蛋也要google食譜,遭朋友取笑。加上各種看似瑣碎的小事:我今日要煮咩嘢食、我今日要陪個小朋友玩咩遊戲、到幾多點我老公返到來可以支援到我⋯⋯Sally坦言,情緒也頗受困擾,試過在房間喊兩個鐘,會想像自己可以從露台爬出去離開屋企,結果還是靠打機和煲劇來讓自己好過一些。

她又試過投稿去Facebook專頁「Day Day Explode日日爆」,那是收集所謂「劣食」的地方,今年7月中才成立。Sally以一碟無味紅蘿蔔甜椒炒肉碎,成功投稿,之後獲得逾200個留言,絕大部分是鼓勵與讚賞,Sally後來PM(私訊)幾個留言說可以提供食譜的網民,更與其中一位成了朋友,多了個情緒疏導的出口。

日日爆的版主Rayne接受眾新聞訪問,形容一開始只是貪玩開Page,後來發現劣食背後有好多小故事。「點解煮到咁樣,可能有啲朋友可能住劏房,或者間屋太細,佢無機會煮嘅,到佢大個咪煮到咁。你就發現煮食同生活好有關係,同成長、家庭好有關係。」Rayne說。

Sally 投稿日日爆,成功獲刊登。日日爆Facebook截圖

香港基督教女青年會於去年7至10月,以問卷方式訪問了813名人(包括462名雙職婦女及351名有雙職婦女伴侶之男士),今個月初發表調查結果,顯示逾8成受訪女士表示因家庭工作壓力而感到個人空間和時間減少、感到身體及精神疲累等,52.6%受訪女士表示自己每天睡眠時間只有5至6小時,29.2%女士更因壓力,需要服用醫生處方藥物。

以為捱埋今個月無事,點知捱吓一個月又一個月

Sally亦是一位雙職媽媽,做中介公司經常要見客,疫情開始就大幅減少工作時間。她與丈夫育有一個明年升小學的女兒,家境算是中產。他們本來僱了保姆照顧小朋友,疫情開始後就選擇自己湊返。Sally說:「開頭一個月嘅時候,都覺得我捱埋今個月應該無事,然之後捱吓一個月、捱吓一個月,然之後半年,然後過完個暑假繼續喎,係九個月,好痴線,然之後而家又講緊第四波嚟緊,隨時又返番轉頭。」 

疫情年初開始爆發,她基本上就不讓小朋友出街,自己一星期出門一次買餸,一日三餐都是自己煮。訪問時大概是10月中,第三波疫情未斷尾,Sally當時表示,對上一次一家三口出街食飯已經是年三十晚(1月24日)。 

其他媽媽朋友覺得她太嚴格,Sally則解釋,「其實唔只係(為了小朋友)健康,我唔想中咗之後大家要隔離,咁我啲貓狗點算,邊個幫我照顧佢哋。唔理貓狗都好,我個小朋友中咗,但係我未中嘅話,我要入隔離營,我小朋友入咗醫院,咁咪即係我要將我小朋友喺病嘅時候,放喺醫院呢個陌生環境。我唔想有機會去面對呢件事,而將條界線都set得頗為高。」她亦都澄清,自己沒有潔癖、也沒有焦慮症。

經過這麼多個月,小朋友現在會反過來提醒Sally,無必要不要出街、人多的地方不要去、放假就留在家,讓她哭笑不得。而疫情發展至今天好似都看不到盡頭,Sally於是嘗試放寬自己的界線。「由我小朋友開返學(10月初)之後,我就有出去買嘢,買咗我疫情下第一套衫,我覺得好開心。我去飲咗第一杯珍珠奶茶,因為我唔想喺條街拎住杯珍珠奶茶除口罩飲。其實係好無聊,而呢樣嘢係以前我隨便就做到嘅嘢,而家就變成係我豁咗出去先敢做嘅嘢。」 

抗疫足足10個月,曾經水盡鵝飛的餐廳。資料圖片

由雙職媽媽到全職媽媽,我係好辛苦

回望過去10個月,Sally日日在家「困獸鬥」,煮飯是其中一樣令她感到辛苦的事。她形容:「可能全職媽媽,佢唔明白你由一個返工嘅媽媽,轉做半職——我一個禮拜一、兩日返工,然後仲要湊小朋友,而去handle一啲我唔識處理嘅嘢,我係好辛苦。」而朋友對她的廚藝冷嘲熱諷,老公未有積極支援,令Sally儲起的負面情緒無渠道釋放。

情緒最差的時候,她說多數是周末,老公在家顧著打機、個女又不斷召喚Sally,「個老公唔太理你,佢唔係唔幫,可能踢兩吓會郁,佢唔係好想理你,然後佢覺得:我星期一至五返工,禮拜六、日都要抖吓。但我係星期一至五24小時(照顧屋企),咁你係咪都要俾我抖吓。」而她可以做的只躲在房內:「嗰吓我係好想喺露台爬走,我唔係跳樓,我都熱愛生命,我好想——走啊。但係我知道我銀包同車匙喺廳,我走唔到。」Sally 甚至試過喊足兩個鐘,她知道這樣不妥,但無打算尋求心理輔導,因為覺得輔導完都改變不了現實。

她的處理方式,可能是在房內扮瞓覺,「真係扮瞓覺,等個女唔會嚟嘈你,等啲貓狗嗌嘅時候老公會處理。純粹係你當我死咗,或者當我匿埋咗、隱形咗,將所有責任俾返哂我屋企人幫我處理,我可能就過咗。」Sally亦都承認,有更多人辛苦過自己,即使收入減半,至少她還保得住份工,然而,她所面對的情緒困擾也是實在的。

玩Switch遊戲《動物森友會》是Sally舒壓的途徑之一。網上截圖

投稿日日爆,苦中作樂,想人讚下 

差不多2個月前,她決定投稿去「日日爆」。投稿作品是一碟無味紅蘿蔔甜椒炒肉碎,內容提及「我只係一個照顧普通小朋友和寵物的普通人,已無其他照顧者咁辛苦,但一點都不好受,多謝你開個樹窿」。逾200個留言,絕大多數是讚賞、啱送飯,簡單而言,就是看不出「劣」在哪裡。

Sally說:「點解會投稿,咪就係唯有咁樣苦中作樂。明明我想人讚吓啫,我都唔係攞啲狗屎垃圾出嚟,有時我真係想人讚吓:喂你呢段時間好努力啊、你做得好好啊,我想人咁樣讚吓啫,就係咁簡單。send得上去都係圍爐啫。」、「我唔係要學多煮廿個餸,我想喺呢個疫情底下survive」。

她之後PM(私訊)了幾個留言的網友,她笑言:「有兩個覆返我,其中一個係情緒上再疏導你。佢又會講吓佢遇到嘅問題係咩,可能咁啱大家都有小朋友,(就講)其實啲男人都係咁,不如你點點點。」然後又會傾去哪裡買餸好、有甚麼食譜推介。

雖說Sally廚藝不精,但食得最多的畢竟是她女兒。阿女點睇?「哈哈哈,佢多數都話:媽媽你煮嘅嘢好好食。我女係比較易𠱁嘅。」Sally續說:「當然我係試過煮咗啲唔熟嘅意粉,然後佢話媽媽好硬啊,哈哈哈,又或者可能啲飯唔係咁熟,『媽媽今日好似有啲唔同啊』,或者可能『有啲咸啊』,係有呢啲嘅,但係唔會影響到我情緒。」

幼女鼓勵:媽媽你煮嘅嘢好好食

Sally又形容,其實小朋友睇到自己進步,好多時候自己打開雪櫃惆悵煮咩好的時候,阿女會走過來「話媽媽你開雪櫃?我話做咩,佢話『你可以俾我睇吓,我諗吓今晚我哋食咩』,佢同我一齊做呢個動作,呢個係以前無發生過嘅。」這反而其實令到Sally感到鼓舞。

Sally識得煮的食材不多,去超市買餸只花不到10分鐘。莊曉彤攝

日日爆版主:平台讓大家知道自己不孤單

「日日爆」意外成為了連結的平台,版主Rayne接受眾新聞電話訪問。她說,7月中開Page時純粹為玩,自己也是廚藝不精的人,不時被朋友取笑,而且當時有位擬參選立法會資訊科技界的烹飪界KOL、DayDayCook(日日煮)創辦人,Rayne說:「其實我本身都有睇嗰個page,我覺得唓~煮啲咁嘅嘢都成百萬人like。跟住我就同friend講笑,不如整返個『日日爆』啦。」

據Rayne的觀察,許多人因為在家工作而煮多咗飯,開Page初期投稿量多,近期已經明顯減少。她亦都留意到,好多人鍾意用氣炸鍋、焗爐,但基層家庭或者剛搬離父母家的年青人,多數是「清雪櫃系列」,雪櫃有甚麼就煮埋一煲。

一些投稿者與留言的網民建立連結,他們會多謝Rayne提供日日爆這個平台,讓他們抒發感受,知道自己不孤單。Rayne覺得很有趣,

大家講吓笑,好似一家人咁,雖然我唔識你、你唔識我,但係大家攞出嚟一齊笑。到有啲人真係遇到困難嘅時候,佢哋又會申出援手去解答、解決。

日日爆Facebook專頁的Cover Photo,右上角有Rayne朋友主動協助設計的logo。

到9月上旬發生一宗母親勒斃智障兒子的慘劇,Rayne覺得好心痛,開始了「照顧者系列」,鼓勵照顧者投稿。「我比較記得係第一個照顧者系列嘅投稿⋯⋯佢有提過自己係想同被照顧者攬住一齊死,然後下面好多人留言,或者PM我哋,就話我有咩幫到佢、可唔可以幫佢煮飯,各式各樣嘅人,提供唔同資源去幫佢。」

我成日話,煮嘢食反映咗你生活或者成長,但呢啲生活或者成長,正正就係你經歷緊呢個社會俾到啲咩資源,或者一個社會嘅貧富懸殊點樣、階級點樣,裡面其實牽涉咗好多政策層面。

Rayne續說:「可能咁樣講啲人會覺得拉得好遠,但呢個正正就係現實反映到出嚟嘅。我哋講照顧者無一個喘息嘅空間,咁究竟發生緊咩事,嗰啲如果長工時嘅又要做基層工,佢哋點算?點解佢哋無標準工時?開OT要有補水,無架喎。」

而Rayne自己都經歷過突然變成照顧者的時候,「其實我媽舊年年初嘅時候都試過整親腳,入去醫院,好彩我老豆行得走得,但我老豆其實都要返工⋯⋯咁就會突然間醒覺,原來我自己都唔會知道自己有邊一刻做照顧者,咁我係咪可以早啲準備呢。」

相關報道:【抗疫10個月】Staycation湧現、報復式消費 心理學家鄭寶君:疫情不可控 消費成另類控制方式




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe