38歲的Rachel（湯頌儀），今年1月讓9歲兒子黃塱寬（寬寬），在立法會教育事務委員會特別會議上，就「防止學生自殺委員會」最終報告的建議發言。寬寬當日說：「各位早晨，我係小三學生，我今日想話畀大家聽，我哋啲學生點樣生活，等大家明白咩叫壓力。我每一朝都唔夠瞓，日日都好攰，都瞓唔夠十個鐘，好多嘢做，真係好多，上堂好多練習要做，係咁寫，又好多工作紙，又預默、又正式默、又評估，寫咁多寫到手軟，好攰，總之無得停，好趕，真係無氣。雖然速算係好容易，不過啲同學計得慢，好慘，要返屋企重新再做多次，去到導修堂我都好攰，手軟都做唔到功課。
其實，淨係得好少同學可以在堂上完成功課，小息時間太少，沒時間跟同學傾偈，小息可以落操場，但呢樣唔得、嗰樣唔得，好多規矩，根本就無得玩，體育堂、音樂堂，時間太少，成日都要評估呢樣、評估嗰樣，體能評估只係跑得一次，然後就坐係度睇人評估，都唔似體育堂。
點解要評估咁多嘢呢，科科都要評，計埋默書差唔多隔一日就一次，你話忙唔忙呀。放學返屋企真係攰到不得了，要做成兩個鐘頭功課，要沖涼又要食飯又要執書包，根本就無得休息，無得玩，心情好差，個心好想玩。有時又會同媽媽拗交，個個都唔開心，返學校好似被石頭砸住我，係咁砸砸砸砸砸，點解要咁對我哋呢，我想放假可以去踩單車、打拳、去drama、去玩，咁可以有啲時間休息，我想問吓教育局，你知唔知道我哋好辛苦，知唔知我哋需要啲咩，可唔可以改變個教育制度呀，我仲有份禮物送畀你。」寬寬說畢遞上一紮花，紀念自殺學童。寬寬發言時，吳克儉一直尷尬微笑，寬寬之後更向他高舉「下台」標語。
性格開朗成日笑的寬寬，有一個「烈女」媽媽Rachel。
Rachel早在2015年11月，已上立法會公聽會，表達對TSA的不滿，她說：「我見到支持TSA的人，不斷說數據、分析、建議、改善教學，但我見唔到佢哋眼裡有小朋友，因為佢哋唔知道小朋友點生活，佢哋嗌緊救命，你哋睇緊嘅數據，係佢哋嘅童年、淚水換返來。剛才教育局官員話佢哋有誠意改進，我哋真係睇唔到，吳克儉今日去咗放假，你哋知唔知小朋友其實無真假期？佢哋返學其實係唔愉快，但吳克儉可以講佢一日睇一本書，真係好諷刺成件事。
我會咁樣形容小朋友返學嘅情況：一日要食三餐buffet，每餐要食三大碟，一定要食晒，食唔切食到12點半要繼續食，唔准停、無得揀，到反胃消化唔到，唔好意思教育局幫你唔到，你繼續食啦......」
Rachel記得，寬寬升小一時，派到大埔一間有很多雙非學童的小學，她覺得唔對路，「呢幾年我帶阿仔去公園玩，見到好多大陸媽媽，佢哋好野蠻，唔會教小朋友要排隊，佢哋啲仔女打人又反話係人哋唔啱，我好唔鍾意佢哋乜都爭、怕蝕底嘅心態。」Rachel見到兒子成日笑又中意玩，心想可能自然學校會較適合他，入學之後卻發現另一個問題：「學校理念好，但資源人手不足，同學之間打架老師無好好處理，結果我個仔每日返屋企，因為與同學之間好多爭執，個人好忟。」
她將兒子轉到屯門一間主流學校重讀小一，「多功課、多測驗考試，基本上要從新適應，由自然學校入去成績追唔上，溫書會喊、晚上發噩夢和磨牙，甚至大叫『好難做呀』。」Rachel為了解兒子的成長變化，開始記錄兒子的說話，例如：「我不想上學，因為太多事故! 在學校有好多抄寫 ! 感覺好忙 !」他又會問：「什麼時候放暑假？會放多久？會不會好多功課？」Rachel曾先後多次去信校長老師，希望予兒子多些空間，並提出具體建議，例如：各科詞語抄寫減至兩個、寫作造句一半由她代筆、以擦黑板等班務代替罰抄等。
與此同時，Rachel因認識反對TSA的家長聯盟成員，於是到立法會表達意見，並向兒子看自己發言的片段及解釋：「唔公道就要出聲，立法會係一個公開平台讓人表達意見，大人小朋友每個人都有權利去講嘢。」後來再有公聽會，他問兒子可會想去表達自己返學的感受，「佢覺得OK，自己寫低有乜想講，我再幫他整理和組織。」
Rachel說，上公聽會之後，兒子學校的家長，見到她會眼望望，校方也有向她了解點解要去立法會，她很清楚自己這樣做，不是要令任何人無面難堪，「我只係想每個做父母的，都可以有條路行。」Rachel中五畢業便出來社會工作，國民教育及佔中她都只是到現場看看，沒有正正式式參與，「有了下一代，因為關心教育，對社會議題也更關心。」為免再受壓，她的兒子已轉到國際學校讀書，學習心情明顯放鬆了。她也留意到兒子關心時事，「佢會問我，點解梁振英叫689，我哋會解釋。」教育制度如再無改善，新世代家長勢成另一支反抗新力量。
