眾新聞 Logo
眾新聞 CitizenNews
眾說

真係辛苦你啦


自從泛民主派15位立法會議員宣布總辭之後,建制派和中聯辦表示好嬲好嬲好嬲,認為有關行動是跟中央搞對抗,並警告對方可能以後也不能夠參選。其實建制派和中央一直都不喜歡泛民主派,現在他們全部都走人了,立法會想通過什麼法案也沒有阻擋,為什麼建制派會這麼擔心呢?今日自稱是「建制派中的反對派」的謝偉俊就將答案清楚地告訴大家了

自稱「建制派中的反對派」的謝偉俊。香港電台照片

謝偉俊表示,在民主派議員缺席下,相信建制派往後少不免要肩負起「反對派」的聲音,避免議會內只餘下一種聲音,「當冇人再幫我哋做呢啲角色嘅時候,自不然我哋就多多少少都要扮演多啲呢啲角色」,聲稱建制派會在不觸犯北京底線的前提下,兼容反對政府的聲音,預計建制派往後日子會較「辛苦」。

原來建制派的憂慮就係以後冇得偷懶。在有民主派參政的日子,建制派只需要擔任投票機器,總之夠鐘投贊成票就搞掂。政府話乜,建制派都會支持,最多得閒冇事鬧民主派兩句當發表咗意見。反正建制派就算多年來在立法會人數超過一半,也永遠唔齊人,結果一點人數就出事,立法會就會流會。始終建制派只有一個角色,就係一部投票機器,最緊要議案獲得通過,討論時候就算有人像黃定光一樣呼呼大睡也沒所謂,最緊要唔好投錯票,或者要等埋發叔,費事俾中聯辦詐型。

但當19名立法會民主派議員因不同原因離開之後,現時只剩下鄭松泰和陳沛然兩名非建制派議員,如果他們如此聽話不去發表意見,究竟立法會會否出現日日Dead Air的情況呢?政府官員發言後,建制派議員你眼望我眼,因為之前根本冇心聽書,連問題都唔識問,反正一直以來他們只懂得對政府唯唯諾諾。唔通個個議員聽完政府官員發言之後,齊齊掌聲鼓勵,然後議案一致獲得通過?如果次次立法會會議如是,相信中聯辦都頂唔順。結果,一直以來擔任投票機器的建制派突然變得很忙碌了。又要夾一夾今次到邊個負責代表出聲,分分鐘開會都要打卡,如果唔係又唔夠人流會,今次冇得賴民主派啦!然後,呢班建制派突然又要做吓戲,扮演反對派的角色。你知啦,叫佢哋擦鞋就叻,叫佢哋做演員會出事㗎!一個唔覺意講錯嘢會唔會俾中聯辦照肺?今次大鑊了,明明人工一蚊都冇加,但係開會又要開足,又要做吓樣俾反對意見,同之前淨係撳個掣投票比較,真係辛苦好多喎!

沒有了民主派議員,建制派議員要做埋「反對派」這一份,日後好唔得閒。

唔怪得建制派不停呼籲15名民主派議員諗清楚係咪辭職,因為建制派大懶蟲真係好驚要返工。大佬,之前十幾萬一個月淨係負責撳掣,而家要佢講嘢喎,真係好辛苦㗎嘛!仲要角色扮演,扮吓反對派,使唔使叫霞姨比盒飯盒你?見到你哋終於要返工,真係覺得你哋好辛苦啊!記住唔好喺立法會瞓咁多覺啦!


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe