眾新聞 Logo
眾新聞 CitizenNews
眾說

我真係好L失望呀!


押後了一個月才公佈、聲稱因為要和中央政府商討支持香港經濟政策的施政報告,真係令香港人大跌眼鏡。仲以為林鄭月娥上北京爭取支持香港政策,點知講嚟講去都係得三幅被。好彩我唔係藍絲啫,如果唔係我只能夠講一句,我真係好L失望呀。

一個月前林鄭月娥係威係勢,表示因為打算和內地政府商討支持香港的政策,所以要押後到今個月才公佈施政報告。大家還以為林鄭月娥有估你唔到超爆政策公佈之時,將整份施政報告由頭睇到尾,由尾睇到頭,都見唔到香港究竟從內地政府得到什麼著數。早知係咁,不如林鄭月娥你趁上個月疫情未爆發得咁嚴重,一早公佈咗施政報告算吧啦!

林鄭在記者會展示這份「等埋北京」的施政報告,但結果讓人大失所望。美聯社

其中一個所謂和內地有關的措施,就是大灣區青年就業計劃。但係人工隨時少過在香港洗碗或者掃地,而且香港人到了內地也不能夠取得內地戶籍。除此以外,林鄭月娥親口承認來往香港和內地非常困難,所以要推出境外投票機制。前排你先至話原來高鐵等同廢鐵、港珠澳大橋也不能夠讓居於內地香港人四年才回香港一次投票。既然特區政府也認為來往中港兩地非常麻煩,而且在內地工作人工少了一大截,請問靠什麼可以吸引香港人到內地工作呢?

其他的所謂粵港澳大灣區發展政策,例如購買房屋便利,前排才有香港人在大灣區購買物業被騙,而家推出相關計畫有鬼用!不如你先叫內地執法部門嚴正執法,讓香港人在內地投資得到保障仲好啦!

至於容許在大灣區內地城市指定港資醫療機構使用在香港已註冊藥物及醫療儀器,請問和香港人又有什麼關係?相關政策只會便利內地人,而不是香港人,真係關我鬼事咩!在港珠澳大橋實施港車北上又點?如果港珠澳大橋真係咁方便,仲使乜推出境外投票,叫班居住在內地的香港人自己搭車返香港咪算囉,咁就唔使浪費公帑!

等咗一個月才公佈的施政報告,之前係威係勢,表示內地政府會支持香港。估唔到竟然只係推出一大咋自打嘴巴嘅措施。你知唔知你真係好令支持你嘅藍絲們失望呀!


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe