眾新聞 Logo
眾新聞 CitizenNews
眾說

我要真抗疫


第四波疫情來勢洶洶,新增確診數字周五(28日)已經接近100宗,更加出現私家醫院小型爆發,還有醫管局員工及其他病人感染。好好笑的陳笑恥,過去大半年除咗喊同埋攪屎棍,真係冇為香港抗疫出過一分力,仲要每月白逗三十幾萬人工。究竟呢個係咪地球上最大嘅笑話?陳笑恥我同你講,我要真抗疫!而家就等我免費送幾招絕招畀你,等你唔使衝出嚟6+1,同羅致光爭做冷面笑匠。

陳肇始作為食衛局局長,推出的抗疫措施,唔係慢半拍,就係唔對焦。

酒吧業界今次又要承受無妄之災,經營派對房間的躺著也中槍,因為最新一輪限制措施要求關閉所有酒吧或酒館以及繼續關閉派對房間。相關措施上一波疫情尚算合理,因為出現酒吧群組。但第四波疫情全因為闊太跳老舞。請問陳笑恥,你估班闊太會唔會同你去蘭桂坊或者蘇豪區酒吧?可能佢哋係呢啲酒吧嘅業主,但係咁cheap嘅地方你唔係以為佢哋會去嗰度跳舞呀嘛?

相反,至少幾個高級會所包括中國會、馬會跑馬地會所和香港會所大廈都出現確診個案,因為闊太和自己的另一半如此高貴,要飲酒梗係去高級會所靜靜地慢慢歎。就算全香港酒吧酒館和派對房間今日開始關門大吉直至永遠,跳老舞群組依然繼續四圍播毒。

第四波歌舞群組大爆發,富豪闊太中招,高級會所如中國會(圖)等都有確診個案。維基百科照片

如果陳笑恥真心想抗疫,應該要求所有高級私人會所暫停營業最少14日,所有曾經到過會所的人士及在會所內工作員工立即進行病毒檢測甚至強制隔離,才能夠有效中斷這條香港爆發疫情以來最強勁的傳播鏈。只可惜陳笑恥聽到呢啲高級會所個名已經腳軟,你唔係信陳笑恥夠膽搞著班大富豪同埋名媛,搞到佢哋冇得耍樂和跳老舞呀嘛?一日有陳笑恥亂咁發出限聚令,繼續懲罰無辜的酒吧和派對房間,放生大量確診人士出入的高級私人會所,我夠膽保證最後一定會攬炒香港上流社會,上市公司主席和家人排隊入廠,第四波疫情也必定比起第三波更嚴重。

至於政府部分高官,唔該檢討一下。早兩日林鄭月娥在立法會宣讀施政報告,政制及內地事務局局長曾國衞竟然在立法會內呼呼大睡。曾國衞表示自己因為扁桃腺發炎需要服用抗生素,所以比較眼瞓,但係認為林鄭月娥發表施政報告,自己要全力支持。各位仲喺立法會入面嘅建制派議員,我真係恭喜曬你哋呀!當日曾國衞有上呼吸道感染依然拒絕請病假,繼續出席施政報告發表大會,仲有人咁大膽連口罩都唔戴。

特首到立法會宣讀施政報告,政制及內地事務局局長曾國衞(左)聲稱自己帶病上陣支持,隨時可能在會議廳內播毒;至於議員,不戴口罩的大有人在。
 

雖然曾國衞應該已經作病毒檢測證實自己並非另一位武漢肺炎病患者,但曾國衛病情如此嚴重,不但需要進食抗生素,更加病到五顏六色,返返下工都瞓著覺。究竟有幾多位建制派議員而家喉嚨少少痕,又有少少鼻水,驚死自己畀曾國衛傳染咗呢?作為特區政府首長級官員,在第四波疫情風頭火勢的時候,竟然做一個極壞榜樣,有上呼吸道感染,不但沒有聽從醫生吩咐拿幾天病假在家中休養兼且自我隔離,更出席大量人群聚集的施政報告發表大會,隨時將病毒或細菌傳染給在場人士。如果有一日立法會全體議員齊齊中招需要攞病假,立法會得番鄭松泰同陳沛然返工結果流會,唔知會唔會違反國安法呢?

整個特區政府上上下下面對武漢肺炎疫情除咗識得抽水同埋清算,究竟做過啲乜?明明第四波疫情爆到九彩,陳笑恥竟然唔限制播毒群組關連地方,相反竟然走去懲罰酒吧和派對房間。醫管局亦好得閒宣布清算罷工良心醫護大計,呢啲究竟算唔算唯恐天下不亂?香港點解會出現一波又一波疫情?大家記得多謝用各位血汗錢出糧嘅特區政府官員呀!


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe