眾新聞 Logo
眾新聞 CitizenNews
眾說

張宇人去咗邊?


兩個月前鬧爆張竹君醫生扮專家嘅張宇人,近排掛住跨過界搞醫生,唔知仲記唔記得自己係飲食界立法會議員。政府今日宣布因為跳老舞大爆發嘅第四波疫情最新抗疫措施,明明今次疫情與酒吧卡拉OK和食肆關係並不密切,偏偏佢哋成為被開刀的一群。張宇人,你唔係好勇武㗎咩!當日你鬧張竹君扮專家,不懂得計算風險;咁今日呢?又唔見你鬧爆林鄭月娥攬炒飲食業界?係呀,我照召喚你呀張宇人,咁夠薑開咪鬧爆林鄭月娥呀笨!

作為飲食業界立法會議員,保護業界利益是常識吧。不過作為立法會議員,用大腦分析應該講啲乜更加緊要。九月時明明因為食肆和酒吧出現群組爆發,所以需要作出相關社交距離措施,張宇人唔去鬧自己,又唔去鬧林鄭月娥,偏偏走去鬧張竹君。去到今次第四波疫情明明係因為班闊太走去跳老舞,闊太同埋另一半根本唔會去蘭桂坊酒吧或者茶餐廳,偏偏卡拉OK和酒吧就被攬炒。曾幾何時好勇武嘅張宇人只係喺Facebook放上一張相關措施嘅貼圖,當日嘅霸氣消失得無影無蹤。張宇人,我真心期待你捍衛飲食業界權益,走去問候林鄭月娥,鬧爆林鄭月娥做乜事走去搵酒吧食肆和卡拉OK開刀。明明佢哋係無辜嘅受害者,亦都係之前你嘅選民,點解今次唔見你出番句聲?你係咪諗住笠水呀張宇人!

謝偉俊話民主派總辭時,建制派需要有人扮演反對派角色,例如自己就係所謂嘅建制派中的反對派。咁樣張宇人呢?明明今次事件就係最好機會畀張宇人扮演呢個角色,幫自己業界爭取應有權益,要封應該走去封跳舞場所同埋高級私人會所。你封曬全香港車仔麵店、茶餐廳同埋酒吧,根本唔可能解決問題。你係咪連咁簡單嘅邏輯都唔認識,定係聽到係班闊太搞到大爆發即刻淆曬底,由當日嘅建制勇武派變成縮頭烏龜,眼見飲食業界無辜被攬炒粒聲都唔出?張宇人,你真係好令人失望呀!


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe