今日中午時分經過公司附近的花旗銀行，發現排隊人龍比以往要多，花旗銀行的客戶經理也表示今日忙過不可開交，很多客人到分行查詢開戶資料。點解花旗銀行突然多人？你懂的，因為花旗銀行是香港少數全外資銀行，而且總部更設於美國，開設離岸戶口也較為方便。當香港金融制度中共化，有得走，你真係唔走？
許智峯犯下了並不嚴重的罪行，竟然要勞煩香港警隊短時間內兩度凍結許智峯及家人的銀行戶口，你還相信本土的香港銀行還有中資銀行還安全嗎？許智峯犯下的罪行，本來和國安法風馬牛不相及，但有人卻用莫須有的罪名聲稱許智峯違反國安法。然後又話許智峯挪用眾籌的八十五萬可能涉及洗黑錢，故此凍結許智峯及家人的戶口。但許智峯人在外地，錢卻在香港的律師樓，究竟許智峯怎樣挪用這八十五萬，呢條問題簡直係百萬富翁一百萬嘅問題。親，我真係諗極都諗唔明喎。如果許智峯違反國安法，為何香港警察不去一早執法，要到許智峯流亡海外才突然強加一條違反國安法的罪名呢？國安法終於成為萬能key，只要想入罪，一句勾結外國勢力就搞掂。係呀，以後可能用美帝發明嘅社交媒體例如facebook都算犯法㗎！想凍結資產咩， 除非你係身無分文嘅乞衣，否則有錢就係罪。好似浸大學生會署理會長方仲賢，由於家人居住九肚山獨立屋又揸波子出入，結果又要勞煩警方調查家人收入來源 。東張西望成日報導鬧市隱形富婆揸住幾個單位扮窮乞食，又唔見警方調查對方收入來源？警隊高層突然可以還清住所貸款，唔知又算唔算收入與官職不相稱呢？
傷盡股東心嘅匯豐銀行，不但股價曾經創出近年新低，又拒絕派息，現時更加全面配合香港警方匪夷所思的凍結戶口行動，客戶們仲驚唔驚？如果一個唔該某年某月某日得罪香港警察，然後畀人話違反國安法，一個唔該戶口又被凍結了。難怪今日花旗銀行門口大排長龍，香港股市也跟外圍股市背道而馳，上午曾經大跌600多點。作為曾幾何時的國際金融中心香港勝在容許資金自由出入，將錢放在香港銀行和資金市場安全度極高。但現在在銀行的錢隨時不屬於你的，要凍結戶口就凍結戶口，誰人又敢繼續投資在香港呢？香港國際金融中心的地位已經斷送，究竟香港樓市會否因為大規模走資而出現斷崖式下跌，大家不妨拭目以待。
