眾新聞 Logo
眾新聞 CitizenNews
眾說

留名等睇葉劉打大佬


葉劉淑儀指丹麥在野國會議員Uffe Elbaek(右二)披露協助許智峯流亡海外,她建議香港修例讓特區有域外管轄權通緝他。

曾經擔任保安局局長的葉劉淑儀創作力量和幻想會嚇你一跳。昨日出席論壇時被問到能否將許智峯遣返的時候,表示丹麥議員早前披露協助許智峯流亡海外,認為行為屬於教唆及協助,但因為香港沒有境外管轄權,所以不能處理。葉劉淑儀建議修改法例,讓特區政府有域外管轄權,可以通緝相關丹麥議員。葉劉淑儀,今鋪我真心撐你㗎!不過要玩就玩大佢,通緝一個丹麥議員有鬼用,美國總統特朗普同國務卿蓬佩奧過去一年不斷制裁中共及特區政府官員,根據相同邏輯,已經違反港區國安法,好應該一不做二不休,如果成功修例,應該第一時間通緝特朗普同蓬佩奧。如果葉劉淑儀你夠膽打大佬,我一定擔櫈仔霸頭位睇好戲。

筆者入定花生等睇葉劉打大佬。

葉劉淑儀唔知係天真定係戇居,竟然認為可以透過修改法例通緝該名丹麥議員。如果係咁,唔通美國表示要制裁相關官員,可以喺美國領事館突然之間派一隊軍隊拘捕林鄭月娥?定係你認為你通過相關法例,丹麥政府會幫你「嚴正執法」,即刻上門拉人?其實相關法例就算成功修改,丹麥人豈不是一樣嗤之以鼻、一笑置之。你試吓派香港警察荷槍實彈入境丹麥,話要去拘捕丹麥議員,睇吓會發生咩事。你估最後被拘捕嘅係入境嘅警察定抑或係嗰位議員呢?定抑或葉劉淑儀認為國際刑警會幫手拉人?成件事咁簡單,陳同佳老早就返咗香港受審啦,使鬼通過逃犯條例修訂咩!

曾經做過局長其實都唔代表啲乜,葉劉淑儀就唔識保安政策,靠陳肇始抗疫分分鐘死得仲快。葉劉淑儀,如果你有一日認為儲夠氣想打大佬,記得早啲出聲,等我早啲入定花生等睇戲呀!


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe