眾新聞 Logo
眾新聞 CitizenNews
眾說

有早知,陳肇始


香港電台影片截圖

古語有云,有早知,冇乞衣。但自從陳肇始擔任食物及衞生局局長之後,呢句說話又係時候更新一下啦,應該叫做有早知,陳肇始。因為護士出身的陳肇始局長唔單止自己廢,仲要當一班IQ比自己高、學歷比自己高嘅醫生冇到,拒絕封關要求,結果武漢肺炎疫情一波未平一波又起。今日的陳肇始打倒昨日的陳肇始,遲咗接近一整年,宣佈真封關。

日前陳肇始宣布對英國真封關,更加污名化武漢肺炎病毒2.0做英國病毒或英國變種病毒,今日又有新措施,就係宣佈對中國以外地區來港人士檢疫隔離增至21日,同時禁止南非登機人士來港。呢啲措施如果要客觀持平地分析,筆者只有一句結論,就係delay no more。可惜今次delay足足有十個月。

今日來自英國和南非的武漢肺炎病毒2.0來勢洶洶,陳肇始即刻全球封關;當日武漢肺炎病毒1.0同樣來勢洶洶,一句基本法保障香港人出入境自由、不可助長歧視、兩地交流頻仍,成功導致武漢肺炎香港大爆發。陳肇始你係得嘅。如果林鄭月娥係攬炒之母,你就係攬炒之祖母,你攬炒全香港,功架十足,百幾條人命因你而死,我真係要畀個like你。

眼鏡襯衣服,做到好細緻,疫情防控卻錯漏百出。

如果你當日夠膽對內地封關,可能今日大家已經喺港九各區食緊聖誕節大餐。多謝你成功攬炒全香港,甚至全世界。當比你聰明嘅醫護人員表示要全面封關,你除咗識喊,仲做咗啲乜?就係換眼鏡、換眼鏡、同埋換眼鏡。

所謂有早知,陳肇始。如果陳肇始當日唔去delay no more,究竟香港會變成點,你話呢?咪就係天下太平囉!陳肇始你真係好叻叻豬,叻到成個地球畀你搞亂曬 !


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe