眾新聞 Logo
眾新聞 CitizenNews
眾說

做乜咁心虛?


世上有一些人因為身有屎,所以便會發生杯弓蛇影的情況。今次教大家呢個成語嘅人就係民政事務局局長徐英偉,唔使出YY,我都知佢心入面諗歪。人哋班區議員成立公民議政平台,徐英偉即刻表示平台非法理據充分,敦促有關人士懸崖勒馬,如果超越雷池半步,必定會採取行動。徐英偉,你驚呀?係唔係做咗唔見得光嘅事所以心虛呢?唔使咁驚住,湯家驊啱啱話咗畀你知,你嘅疑慮係多餘㗎,不如飲番啖茶定下驚先啦!

徐英偉資料照片

這個由區議員牽頭成立的公民議政平台,到目前為止都未有實質證據顯示屬於違法組織,至少聽個名都知道唔可能犯法。議論一下政策都犯法,咁呼吸會唔會違反國安法呀?人哋個平台乜資料都未有,徐英偉即刻衝出嚟話人哋犯法,唔知徐英偉知唔知乜嘢叫做無罪假定呢?呢一點湯家驊就心水清啦!湯家驊表示,看不到有民意代表討論社會議題的平台有什麼問題。係囉!討論下吹下水都唔得,咁樣仲講乜鬼基本法賦予人民言論自由呀!就算相關組織並非由區議員提倡成立,一班熱愛政治人士聚首一堂討論下政情都唔得,其實係咪可以宣佈一個兩制已經失效呢?徐英偉,你係咪想宣佈香港連基本嘅人權自由都唔再擁有,仲衰過北韓,夠膽你就答「係」。

屯門區議員張可森Facebook

區議員努力議政就畀人話違國安法,出席率少咗1%又畀人話偷懶,咁樣你玩曬啦!唔通政府,尤其係徐英偉之流一直都被建制派區議員誤導,以為區議會議員職能只係蛇齋餅粽搞下小白象工程,而家民主派區議員努力工作即刻嚇到標尿。係囉!乜民主派區議員咁衰咁勤力㗎!下次不如選舉之前寫到明區議員淨係准搞蛇齋餅粽同埋小白象工程算數啦!咁下次我可以叫樓下個看更報名參選賺下外快,反正議政都係有罪,你話夠唔夠變態呢?


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe