今年不斷為市民帶來驚喜嘅特區政府，去到2020年即將結束嘅時候，又再次為大家帶來估你唔到嘅消息。林卓廷剛剛在一兩天前才被建制派KOL誣捏是黎智英代言人，更質疑林卓廷上網拍片是否違反黎智英保釋條件，周一（28日）林卓廷又再次被針對，被廉政公署拘捕及起訴涉嫌披露一名受廉署調查人士身分。
根據庭上讀出3項控罪，控方指林卓廷被控在去年12月至今年7月其中3日，明知或懷疑有被指稱或懷疑已犯《防止賄賂條例》所訂罪行的調查正在進行，無合法權限或合理辯解，向公眾或部分公眾披露該項調查人的身分，即721事件時任元朗警區助理指揮官（刑事）游乃強。林卓廷之前被控在721事件中參與暴動，今時今日這名721暴動受害人竟然再次被檢控，認真估你唔到。因為今次特區政府決定動用神獸crazy拉人，再一次亂咁拉人。上次就話靠警隊出手，今次就靠無廉恥公署出手，唔係，應該係廉政公署先啱，拘捕721受害者，唔知幾時721會成為香港版8964，以後7月只有20+1日呢？
721事件最估你唔到嘅，就係將成語動畫廊入面「指鹿為馬」呢個成語演繹得淋漓盡致。當日與暴徒握手並讚揚對方是英雄嘅立法會議員，竟然成立國家安全教育中心，更表示建議在香港恢復鞭刑，唔通係因為當日見到白衣暴徒打得咁興奮諗住自己可以參與埋一份，所以提出在香港恢復鞭刑？過百個無差別襲擊嘅白衣暴徒，只有幾十人被拘捕，當中小牛農莊話事人西瓜佬陳志祥據聞已經潛逃海外。但係聲稱會嚴正執法嘅香港警隊不但未有拘捕餘下百人，更加對於潛逃的罪犯選擇包容。咦，你哋之前唔係強烈譴責流亡海外嘅許智峯㗎咩？點解又冇人譴責西瓜佬嘅？至於在現場被襲擊嘅無辜市民，竟然被拘捕因為涉嫌參與暴動。當日懷疑勾結黑幫嘅警隊人士尚未被人拘捕，不過披露游乃強被調查的林卓廷就率先被廉政公署控告。廉政公署，你哋好叻叻呀，你哋嘅水準真係越來越接近香港律政司同埋香港警隊啦！犯錯嘅人你哋未拉，就率先拘捕受害者，估唔到指鹿為馬呢個成語你哋都學得幾快！
1995年的ICAC廣告（指鹿為馬篇）
以前嘅人話，香港，勝在有ICAC。去到2020年，呢句說話要稍作修改，應該話香港沉淪，勝在有ICAC。直接向特首負責嘅廉政公署，其實隨時可以改個名做無廉恥公署。唔怪得你哋都可以陀槍，因為你哋同黑警真係冇乜分別。
