眾新聞 Logo
眾新聞 CitizenNews
眾說

賣港才是永恒


創新及科技局長薛永恒出席電台節目時表示,現時平均每日仍有幾十宗武漢肺炎確診個案,對抗疫工作構成非常大的困擾,令他感到很無奈,有時甚至會憤怒。薜永恒又表示,理解市民關注個人私隱,但認為在抗疫之路下,大家要短暫放低對私隱的考慮,善用現有科技記錄行程,協助找出潛在感染風險人士,讓本港盡快回復正常。薛永恒嘅憤怒,其實我哋個個香港人都明白嘅。不過你鬧香港人有用咩?係時候同薛永恒回顧一下武漢肺炎疫情喇。

創科局局長薛永恒。香港電台直播影片截圖。

點解香港會有武漢肺炎?因為當日薛永恒嘅同事拒絕封關,結果造成第一波疫情;第二波疫情就因為封關太遲;第三波疫情亦因為薛永恒嘅好同事,容許豁免檢疫人士將武漢肺炎病毒帶入香港,再由一班愛國愛港藍絲們透過慶回歸活動將第三波疫情推到頂峰;至於第四波疫情就牽涉一班同樣愛國愛港,但係有錢過第三波感染人士一大截的富貴藍絲跳老舞造成。薛永恒你嘅憤怒我明白嘅,千錯萬錯就係垃圾政府同埋藍色嘅錯。咦,咪即係你嘅好同事,仲有其他支持政府嘅藍絲囉!係呀,如果當日一早封關,香港都變台灣;武漢肺炎關我乜事,聖誕節大家食緊聖誕大餐、除夕晚大家睇緊煙花㖭啦,使乜搞固冇乜人下載嘅「安心出行」程式啫。係囉,藍絲掛住慶祝回歸,搞到第三波疫情大爆發;仲有一班喺背後推波助瀾嘅人,例如與前特首關係密切嘅香港船東會大力推動海員免檢疫入境,搞到第三波疫情咁嚴重囉!去到第四坡疫情,又要記藍絲們一功,成日掛住同班小鮮肉跳老舞,搞到全港各行各業攬炒。香港人嬲唔嬲?我嬲㗎!絕大部分市民肯定比薛永恒無奈同憤怒㖭!

EYEPRESS照片

不過薛永恒竟然叫大家短暫放低對私隱嘅考慮,下載「安心出行」程式,幫助找出潛在感染風險人士喎。好呀,我贊成呀,不過封咗關先講。今時今日繼續有豁免檢疫人士進入香港,亦都有回港易計劃呢個重大防疫漏洞,淨係叫香港人放低對私人嘅考慮有鬼用!夠膽你就封關封埋大陸嘅關,話曬國內疫情又開始有反彈跡象,講到明要外防輸入,就要一視同仁,真正全面封關。至於呢個「安心出行」程式,最應該下載嘅當然就係同第三波及第四波疫情關係最密切嘅藍絲率先下載啦!邊個叫你哋又去慶回歸又去跳老舞攬炒香港,第一班應該放低自己私隱考慮嘅當然就係你哋啦!薛永恒, 記得記得記得叫班有錢佬同闊太下載兼且善用科技喎,唔好好似之前咁拒絕披露自己行蹤,激嬲袁國勇教授呀 !

薛永恒其實真係幾搞笑,講到香港人好似係武漢肺炎嘅原罪犯咁樣,但係就唔記得咗自己嘅上司林鄭月娥仲有好同事陳肇始點樣成功展示抗疫失敗教材,做成香港一波又一波疫情。你嘅憤怒同無奈我明白嘅,只可惜變幻不是永恒,賣港才是永恒 。薛永恒記得畀啲掌聲你嘅好同事,多謝佢哋成功攬炒香港呀!


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe