眾新聞 Logo
眾新聞 CitizenNews
眾說

跟車太貼,易生意外


自從去年初開始,幾乎日日準時開波嘅疫情記者會,衛生署昨日突然宣佈將會改於網上進行。之後被多個傳媒工會發聲明批評,特區政府一日後突然又宣布因應持份者對於網上記者會的意見,將會從今日開始改在政府總部舉行。袁國勇教授接受訪問時亦表示,只需要做最基本防疫措施,取消實體記者會並無必要,更加表示如果記者會也不安全,上班也同樣不安全。今次極速轉軚,基本上只反映整個特區政府做事有多求其,完全沒有考慮過後果就宣佈更改重要政策,也成功解釋為何香港抗疫如此失敗。

整個特區政府由上而下負責抗疫的團隊,個個唔係冇料到就係求其hea做,再唔係就事事高度政治化,結果當然就係抗疫失敗收場。在第一波疫情,全世界都知道封關有用,偏偏有人因為政治考慮,堅拒封關,直到第一波疫情成功入侵香港,就表示封關已經在無意義。明明自己犯錯,依然拒絕認錯,講到好似與自己無關咁樣。到第二波疫情,終於宣布要對海外國家封關,偏偏又要留下一個為期幾日嘅空窗期,結果第二波疫情就因為一個不必要嘅延誤喺香港爆發。去到第三波疫情,一早已經有人包括筆者表示極可能來自免檢疫人士,但偏偏特區政府死口唔認,要去到理你工大學學者踢爆講大話先至肯改口。

「無腦」的全日禁堂食政策,令升斗市民無啖好食,要雨中露天撐傘食飯盒。周滿鏗攝

第三波疫情其中一個最具爭議性嘅措施,亦即係全日禁堂食,但竟然冇一個人包括聲稱智商高達160嘅羅致光同埋嚟自企喺打工仔對面嘅前工聯會成員何啟明都察覺唔到香港有人放午飯期間欠缺合理用餐地點,結果又係後知後覺,唔畀人鬧都醒唔起,盲目推出政策而欠缺適當配套係絕對會出事,最後又要幾日後推翻自己當初嘅決定。到第四波疫情,醫管局每次聽到有員工感染一定射波畀員工,有骨咁樣溫馨提醒員工唔好參與群組聚集,要做一個好榜樣。點知去到聯合醫院懷安科病房大爆發,畀前線員工踢爆防疫裝備使用條件不合時宜甚至有感染風險,先至靜雞雞修改相關準則。至於全民病毒檢測,第三波疫情期間只要有人反對就即刻被上綱上線,標籤為反政府反中央。去到第四波疫情,阿爺唔再俾壓力做全民病毒檢測,即刻改口話全民病毒檢測計劃不可行。至於武漢肺炎亦被特區政府在第四波疫情列入禁字名單,因為咁樣做係污名化武漢。不過陳肇始自己就帶頭用英國病毒或英國變種病毒形容最新病毒株,帶頭污名化英國。如此思維抗疫,香港疫情大中華區最嚴重,實在係合情合理。

這個管治班子抗疫無心無力。

特區政府過去一年的抗疫表現就似足球聯賽中的降班膽,由頭帶到落尾。偶爾成功逼和對手即刻字hi表示防線做到滴水不漏。輸畀對手唔超過三球就話,「你睇,英美國家咪輸得仲慘,人哋輸緊4比0呀!」至於自己豆腐渣防線輸緊20比0就粒聲唔出當冇事發生。整個特區政府抗疫表現如此拙劣,想清零?嘥氣啦!一日唔換走廢柴局長兼廢柴特首,香港清零嘅一刻,就係七百萬人死清光嘅時候。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe