眾新聞 Logo
眾新聞 CitizenNews
眾聞

太太疫市創婚紗店向有需要人士義借 感激元朗街坊FB群組:遠親不如近鄰


在一個街坊分享資訊群組中,有個話題高手叫「謝太」,分享的帖文離不開兩種,一是使人嘩然兼驚歎的美食分享,一個人吃臉盤般大的白飯當前菜;另一種則是問街坊有沒有需要租借禮服,前線醫護、急救員、殘疾人士、長者或有經濟需要者能免費租用,也不時會送出新淨餐具。

謝太用字豪情粗獷,食量驚人,不見其人或會猜想是個中年「師奶」,怎料一日她在群組訴苦,說自己或未獲教職續約,害怕會失業,又透露泰國是自己家鄉,對泰國社運特別揪心,揭開這位「阿太」的面紗,卻又令人對這位「佬味濃」小妮子更好奇。

「路係人行出嚟。」謝太笑說。失去工作後膽粗粗創業,還要是在疫情下嚴重受創的婚紗業。謝太希望讓客人能舉辦一場無憾、得體婚禮,然而不時遇上故意刁難客人。現在再談起,她仍對元朗街坊的支持感激不盡,也感謝大家鼓勵她創業:「元朗嘅街坊好有心,有種遠親不如近鄰嘅感覺......令我好感恩。」2020年,難關接踵而來,樂觀的謝太坦言有時好人難做,提醒毋忘初心:「有陣時會氣餒,但我會記住仍然有好多人,需要我哋去幫手。」

謝太(Maggie)是「慧子婚紗」的老闆娘。黎卓欣攝

雖不是第一次見到「謝太」的樣貌,但看見真人還是有點訝異。在擁有近4萬人的Facebook群組中,有個飯量驚人的名人,令放題店老闆都聞風喪膽,街坊看見有幾人份量的套餐推出,都會召喚她來挑戰。叫得「阿太」,還以為有一定年紀,怎料眼前的女生比想像中還要年輕。一頭咖啡色的捲髮,腦勺後綁著一個大蝴蝶結,眼皮塗上帶閃粉的眼影,似是日本少女的打扮。

婚後才搬到元朗居住的她,笑說對元朗最初的印象是「啲人都幾粗魯,開口埋口都會夾雜下啲粗口」,後來相處久了,才感到街坊的爽直真摯。

「我覺得元朗嘅街坊好有心,好有一種遠親不如近鄰嘅感覺......講一講就會即刻去互相幫忙、好團結,個群組好似將元朗黃嘅街坊凝聚埋一齊,比好多歡樂大家、有傾有講。有陣時好大壓力,睇吓大家啲post,又或者畀大家又笑下我啲post(笑你嘅食量?)應該係,哈哈。」

謝太在群組中分享美食,圖為一人份量。社交網站截圖

去年,謝太失掉工作後很是迷惘,也曾在群組訴苦。街坊見狀紛紛留言也勉勵她不如試開婚紗店當老闆。

「佢哋會同我講,欣賞我化嘅妝、覺得我美學觸覺好強、亦有話覺得我嘅配搭很好。」創業意念變行動,開店後,街坊們又主動提點她護理裙褂及清潔婚紗的方法,也有人教她傳統的習俗儀式。

不過,疫情使婚紗業重創,在市道低迷時入行,謝太笑說自己是「破斧沉舟、已後無退路」:「所以要諗好多方法,令自己可以捱得到。」新人數量減少、婚期改完又改,她坦言生意難做:「佢一改,有其他人預約咗相同嘅嘢就要cancel,會建議佢試吓相似嘅款式先,如果真係唔得,頂多買多條裙返嚟,但成本就會好多。不過點計都係一個好好嘅學習機會,捱得過呢關,之後有其他挑戰都可以應付到。」

工作室舖上一層軟綿綿的地氈,謝太準備了拖鞋,又著記者先消毒才就坐。疫情下本已是緊張大師的她,更是小心翼翼,讓客人放心:「每日都會清潔工作室、定期搵清潔公司做霧化大消毒,如果客人試過啲衫,一定全部攞去洗。我成日都話,嚟我度碌地都得。」

作為初哥,她有感在艱難時期同行互相扶持更顯可貴:「成日話『同行如敵國』,我覺得黃色經濟圈並唔係咁,行家會互相分享經驗、合作,去幫助大家。」

 難捱的一年 分享溫暖

「2020對我來講,係好難捱嘅一年,唔止我一個,全香港人都係咁。我就諗可唔可以盡我最大嘅能力去幫人。」「慧子婚紗」現時主力租借結婚用品,也會包辦化妝服務,前線醫護、急救員、殘疾人士、長者或有經濟需要者仍能免費租用。

謝太記得,有位婆婆曾主動聯絡她,說是從一些送免費物資的群組中,獲悉她能免費借出婚禮物資。一談之下,發現對方是為智障的兒子及媳婦借用禮服:「傾傾吓又發現原來婆婆好多婚禮流程、細節嘅嘢都唔識點樣去處理,就決定幫佢哋。最後仲就幫手化埋妝、佈置個場地。當時連攝影師都係義務幫手,好感動。」

去年同樣爆發社運的泰國,是謝太的家鄉,娘家親人都在泰國,看到兩地的政府壓制人民的新聞、特別揪心。辦婚宴總算是喜事,她笑言開設這間店既是幫人,也是為自己在絕望的社會環境中帶來力量:「有客人結婚時已懷孕,最近打嚟話訂埋百日宴嘅嘢,好似睇住佢嫁人再有埋小朋友咁。同埋有得見住咁多化妝品、靚衫都自然會好開心,有陣時我會影啲產品相,都會覺得好靚,自己心情都會好咗。」還是藏不住那點少女心。

謝太笑言開設這間店既是幫人,也是為自己在絕望的社會環境中帶來力量。黎卓欣攝

 開業後難關接踵 曾感氣餒 

不過,做生意不同以往做善事,有了錢銀交易,免不了會出現爭執。「有啲人可能睇完其他資訊或者報導,以為呢度係不限條件、完全免費,當呢度係『免費放題』,揀完一堆名牌禮服但又要求唔畀錢,有啲話純粹想借嚟自己影相。因為唔駛畀錢,有啲人又會好冇交帶,hold住啲嘢但最後無嚟到。」

為免被濫用資源,她只好限制免費租借的款式及數量,並要求對方提供婚期證明:「有陣時你拎咗咁多嘢,萬一真係有更加需要嘅人,要借借唔到,令佢嘅婚禮有遺憾,咁人哋會好慘。如果佢需要多過三樣物品,我會畀義租價佢,嗰啲錢會捐出去。」

樂觀的她後來學會一笑置之:「我會得啖笑,或者又喺返群組到分享,大家當笑話睇吓,原來會有啲咁嘅人,見盡人生百態。」

點都好,我會同自己講毋忘初心,有陣時我會氣餒,但我會記住仍然有好多人,需要我哋去幫手。
「點都好,我會同自己講毋忘初心,有陣時我會氣餒,但我會記住仍然有好多人,需要我哋去幫手。」黎卓欣攝



請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe