眾新聞 Logo
眾新聞 CitizenNews
眾說

國安法下,立即終身監禁都得


預咗有些頭號人物會被拉,但一拉拉五十個,仲要連鍾庭耀都拉(編者按:警方的說法是,鍾庭耀協助調查,並未被捕)。政府話唔識政治專心民生。警察問市民係咪咁憎佢哋。乜乜部叫國際社會重回正軌。哈哈哈。

警方國家安全處高級警司李桂華話,被捕者觸犯顛覆國家政府罪。美聯社

首先,又話冇追溯力?唔知佢哋依家想追溯到幾時呢?「冇追溯力」本身已經冇追溯力,好似八萬五咁,唔存在了。

第二,否決預算案導致特首下台係基本法寫明有的程序(50同52條),基本法犯國安法呀?立法會又有彈劾權喎(73條),又犯?

第三,反對政府同叫特首下台又唔得,咁9成市民都犯國安法啦?獻世派如果投反對票又犯啦?左媒鬧政府抗疫不力?煙仔何登報叫林鄭下台?全世界犯晒。

其實告唔告得入,係仲未知,政府可能係「司法騷擾」,唔理咁多搞X你一輪先,但對依家的法院,相信好多人冇咩信心,真係好難講。又或者,趁依家拉咗你上門搜其他嘢,跟住生安白造插贓嫁禍,又得。

仲有,因為偉大的法院已經按國安法指示,唔俾保釋,呢班被「司法騷擾」的人,都好可能保唔到釋。於是打幾耐官司就等於坐幾耐監,到終院「還佢清白」,大家又要感恩香港有法治,流涕法官都係青天了。

點知,你一踏出終院,又再生安白造插贓嫁禍,用國安法告X你另一樣嘢,於是又拉返你入冊,法院繼續唔俾保釋,loop到永遠。鳩告你國安法,變相判你終身監禁,得咗。馬道立尋日講咗乜?Who cares?


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe