眾新聞 Logo
眾新聞 CitizenNews
眾說

話你知:以色列兩星期前發生過「顛覆國家政權」


香港警察話,否決財政預算案,逼特首辭職,癱瘓香港,就叫「顛覆國家政權」,咁以色列兩星期前其實都發生過一次「顛覆國家政權」。原來在12月23號,由於以色列執政聯盟內鬨,國會在期限屆滿都未能通過預算案,要解散政府同國會提早大選。唔知有幾多以色列議員因為「顛覆國家政權」被捕呢?同埋我諗依家以色列梗係癱瘓緊,機會嚟啦伊朗。(ps全個內閣改為署理性質,而3月23號會大選,未聽聞因為疫情延遲)

以色列國會資料照片。美聯社

第二,唔知香港幾時獨立咗,否則叫香港政府下台點算顛覆「國家政權」?第三,林鄭辭職就會癱瘓香港,咁梗係張建宗想癱瘓香港啦,因為基本法52同53條訂明,需要辭職的只係特首,唔係成個政府,政務司司長會署任,事實上2005年老董辭職都係曾蔭權署理,所以警察梗係想講張建宗會癱瘓香港啦,幾時拉埋佢?

第四,其實要真係做到特首下台,需要經過 1. 反對派取得立法會過半;2. 否決財政預算案(73條);3. 經協商仍不能解決,解散立法會(50條);4. 期間特首可按上年開支批准臨時撥款(51條);5. 反對派再次取得立法會過半;6. 重選的立法會繼續拒絕通過所爭議的原案(52條)7. 先會特首辭職。

而特首辭職,係咪就可以威脅到啲咩呢?如上面講過,仲會有:8. 政務司司長署理(53條);9. 重選行政長官(53條);10. 新行政長官上任,跟住成段再loop過。除非可以有 11. 反對派在選委會過半;12. 反對派勝出行政長官選舉。但咁樣一嚟又會 13. 反對派變成執政派。媽呀我好亂呀。同埋大佬,關公都只係要過五關,依家民主派要行咁多步,仲要第一步都未行,就已經犯咗法,好難捉摸呀。

講到底,如果在外國,贏選舉政黨輪替,根本唔係「顛覆國家政權」,甚至係「憲政之常道」。就算在香港,如果唔係加插條國安法,政黨輪替亦都唔係犯法,基本法根本冇講過選舉一定要由一面贏,反而立法會有否決權同彈劾權,就真係基本法有寫啦 (73條),但你跟足基本法佢都可以話你違反國安法,咁唔通基本法違反國安法?成日講咩「外國都有國安法」,哈哈哈。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe