眾新聞 Logo
眾新聞 CitizenNews
眾說

萬千星輝立法會選舉


有關今年9月立法會選舉,今日(12日)又有最新小道消息。根據路透社引述北京消息人士報道,由於中共非常擔心香港的民意能夠透過選舉公平公正公開地展現,故此考慮再次押後今年九月五日舉行的換屆選舉,更加可能提出有關特首選舉委員會制度改革。其實搞咁多無謂嘢認真嘥氣,不如索性宣佈一國一制,取消香港立法會,然後由嗰班港區人大政協扮做議會代表,直接向中聯辦匯報好過啦。咁樣唔單止唔使阿爺日日心驚膽戰,更加可以創造經濟效益添!

既然中共咁驚輸,其實就算點改立法會選舉都係嘥氣,只要有選舉就有機會輸㗎啦!你估而家真係睇緊少林足球,當自己係謝賢,繼續欺騙全世界話畀人聽香港有民主呀!喺2021年你咁樣做同北韓又有乜嘢分別?如果咁樣做都搞得掂,平壤一早做咗國際金融中心啦!起碼人工同埋地價平香港一大截,金正恩對抗武漢肺炎仲叻過林鄭月娥添!係囉,又要選,又要怕輸,你咁矛盾,最好嘅方法就係永永遠遠取消選舉,冇選舉自然就冇輸贏,即係打和super。到時每隔四年就搵TVB搞番個萬千星輝立法會選舉,宣布邊幾個人大政協成功透過超小圈子選舉獲選為所謂嘅立法會議員。最多畀你喺Big Big Fun投票,不過就好似港姐選舉一樣,專業評審投票佔九成,淨返一成就畀市民去Big Big Fun投下票囉。真係選唔到咩?就交畀Do姐現場投下最後神聖一票,好似2017年選港姐咁,咁你實滿意啦!到時成功獲選嘅立法會議員,仲可以上台多謝樂小姐添!唔係,應該係習大大先啱。

至於取消立法會選舉有乜嘢經濟效益呢?首先立法會大樓終於可以清拆,然後高價賣地,攞嚟興建甲級商廈。呢一幅肯定係百億地王,到時仲唔豬籠入水?至於搞呢個萬千星輝立法會選舉,又可以幫冇曬橋嘅TVB製作全新節目,好過成日抄隔離台,人哋搞全民造星你就整個衝上雲霄大選對撼。整番個萬千星輝立法會選舉夠曬破格,保證全宇宙都未試過,係咪好正先?

況且嗰班建制派其實有冇選舉有分別咩?立法會財委會表決涉及一百四十三億五千萬元的河套區項目時,擔任立法會議員已經有八年的民建聯梁志祥,竟然連基本立法會程序都唔知道,例如委員需要在開會前一天下午時提出分開表決要求官員才會出席。然後財委會主席陳健波向傳媒表示,以往財委會審議項目民主派會員會自動自覺要求官員出席解釋,建制派議員就算做咗八年都仲未熟習程序,唔知道要自己提出要求。你估押後一年選舉有用咩?發足夢八年嘅建制派,你想佢哋一年之間變番正常人係唔可能㗎。

民建聯梁志祥做了八年議員,竟然唔知財委會程序,發夢發足八年。

既然立法會存在價值已經變咗零,咁不如索性將整件事娛樂化,節省所有與選舉有關嘅開支,炒曬班冇鬼用嘅選舉事務處職員,攞立法會大樓用地用作興建甲級商廈,再畀橋TVB搞個別開生面嘅選舉節目,好過喺度不停搬龍門,驚自己選舉要輸咁樣衰啦!


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe