眾新聞 Logo
眾新聞 CitizenNews
眾說

洗頭艇與快艇大不同?


九龍城區區議員、律師黃國桐和另外11人今早被國安處上門拘捕,涉嫌「串謀協助逃犯」,消息稱與12港人案有關。據了解,被捕的11人涉嫌向12港人提供金錢資助,提供偷渡意見,安排中間人在陸上接送,以及偷渡期間的藏身地點等。原來被拘捕的12人因為協助他人偷渡也會違反國安法。其實案件嘅重點會唔會係偷渡嘅交通工具呢?因為五年前有一位香港人,在香港透過非法途徑進入中國大陸,但係據聞佢坐嘅係洗頭艇,而唔係12港人坐嘅快艇,所以呢件事件,香港警方從來沒有執過法。 呢件事件大家仲記唔記得呢?係時候同大家溫故知新。

內地媒體2016年2月29日播出銅鑼灣書店股東李波的訪問。李波聲稱,自己是偷渡回內地,配合內地司法調查。澎湃新聞截圖

話說喺五年前,銅鑼灣書店負責人之一的李波在2015年12月30日下午6時,在柴灣康民工業中心的貨倉,被多名男子帶走。事件擾攘了一段時間,在2016年2月29日,大陸《環球時報》專訪李波,稱香港「被失蹤」書店股東李波是自願回內地配合調查。李波承認「我是在朋友的幫助下偷渡回內地的,所以沒有用到「回鄉證」,具體情況不方便透露。」五人其後先後返港,不約而同地要求警方銷案,亦同稱不需香港政府協助。

根據建制派立法會議員吳亮星引述某某朋友未經fact check的小道消息,李波是透過坐洗頭艇返回內地。唔知係咪咁所以當時沒有國安法嘅香港,忠誠勇毅警隊選擇不去跟進有人偷渡事件呢?李波同埋12名香港人離開香港水域嘅路線可能有一定程度重疊,之不過12名香港人偷渡事件,香港警察嚴正執法,就算係黃國桐律師同埋其他11人今日也被國安處拘捕。至於銅鑼灣書店事件呢?當時整個警務處人人做阿叻,當然唔係話佢哋覺得自己可以玻璃變鑽石,而係「未聽過」、「我唔信」、「我唔知」、「我睇唔到」、「 唔關我事」。結果,一單可能危害國家安全嘅偷渡案件,就喺香港不了了之。

當年五個人不約而同地被失蹤,更有人在香港透過非法途徑進入內地,明明就係一宗嚴重案件,點解當日香港警務處選擇冷待事件呢?唔通真係洗頭艇同快艇有結構性嘅分別。呢一刻,我唯有都係扮一扮阿叻,「我唔知」、「我睇唔到」、「唔關我事」,因為有common sense嘅讀者應該諗到答案係乜嘢嘅。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe