眾新聞 Logo
眾新聞 CitizenNews
眾說

光宗耀祖譚耀宗


恭喜晒你呀譚耀宗,你終於做到俾阿爸對你嘅期望啦!耀宗呢個名,好明顯代表光宗耀祖。能夠同國家領導人一樣被美國制裁,簡直係譚耀宗嘅榮幸。做咗一世奴才,終於有機會升呢,被美國認證,確定成為賣港賊,今日,譚家應該好高興。

譚耀宗從政多年,坦白講,冇乜幾多件事可以叫香港人記住,最有印象嘅一件,恐怕就係當年喺伊利沙伯醫院打尖做手術。做咗咁多年人,譚耀宗終於有第二件事,可以讓香港人記住。2021年1月15日,美國財政部宣布,制裁6名損害香港自治的中港官員,包括譚耀宗等人。譚耀宗回應指早已預料會被制裁,重申自己從來沒有資產在美國,並批評美國的行為霸凌及干預香港事務,又稱自己有很多朋友支持,即使制裁會帶來不方便,為了維護國家安全是值得,他強調自己作所有事情都是為香港大局及繁榮穩定,聲稱自己所作的行為是正義、合情、合理和合法。譚耀宗,你終於有抬起頭做人啦。在立法會擔任議員年代,其實冇人記得你做過啲乜,也許因為你真係冇乜嘢做過。去到做全國人大常委會委員,你嘅身份,其實不過係一部錄音機,或者係傳聲筒,冇咗你,搵一個有眼耳口鼻嘅人都做到。但係喺2021年1月15日,你為黨嘅付出終於得到美國嘅認證,你可以同你嘅主子一樣,得到被制裁嘅機會啦。其實制裁又有乜好怕喎,全香港大部份市民都冇資產或者物業喺美國,想入境美國要首先申請簽證,大不了冇得買美股Tesla大炒特炒。

可惜譚氏一家人並非個個愛國愛港,譚耀宗嘅兒子竟然有中國人做,走咗去澳洲居住,更加宣誓效忠澳洲,成為澳洲公民。大家記唔記得澳洲對偉大嘅祖國做過乜嘢壞事?五眼成員聯盟之一嘅澳洲,澳洲政府呼籲國際社會針對武漢肺炎疫情源頭展開獨立調查,中國駐澳洲大使成競業當月底接受澳媒訪問時更加直言,澳洲對武漢肺炎起源展開調查的提議是「政治操弄」,要對中國「展開政治攻擊」,並稱「中國民眾對澳大利亞的行為感到不滿和失望」。結果中國對澳洲實行反制措施,在今年冬天,中國人不夠煤炭發電和取暖了。澳洲呢個咁可恥嘅國家,譚耀宗竟然容許兒子背棄祖宗,宣誓效忠針對偉大祖國嘅澳洲,實在令人憤怒!譚耀宗,係我就唔忍啦!一係叫個仔即刻放棄澳洲護照,返去大灣區做個勇敢中國人,一係就唔好姓譚,唔好俾佢有辱家門。

譚耀宗成就已經超越譚惠珠、譚詠麟、譚德塞(講吓笑啫),成為譚氏宗親會近代最傑出人士,佢所得到嘅榮耀絕對係前無古人、後無來者。只可惜譚耀宗有個不肖子,竟然背棄偉大祖國,甘心宣誓效忠澳洲,成為洋奴。呢一刻係我就唔忍啦!話晒阿爸啱啱升呢可以同特首同埋其他國家領導人睇齊,被美國制裁,你個衰仔竟然走去同洋鬼子聯手制裁祖國,搞到大東北人民冇電保暖,可怒也!我真係好希望譚耀宗一家願榮光歸大灣區,身為中國人,死為中國鬼,一心一意報效中央,放棄外國國籍,做個勇敢中國人!


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe