眾新聞 Logo
眾新聞 CitizenNews
眾說

買年花危險 買樓花安全


2021年首個大型樓盤推售,位於啟德的Monaco明明不在啟德海濱,前面又有兩個樓盤阻擋,卻聲稱自己處於Kai Tak Harbour。不過地產商係唔會錯嘅,從來唔會有人因為違反商品說明條例而被起訴,因為相關條例只會起訴賣粟米斑塊唔用石斑嘅茶餐廳。不過呢件都係一件小事,因為如果唔做足功課就去用幾百萬甚至過千萬買錯樓,業主同樣有責任。不過今日賣樓盛況實在令人擔心。幾百人聚集喺售樓中心排長龍等買樓,分分鐘仲逼人過維園年宵,但係今日話特區政府已經盡咗全力嘅陳肇始,對於售樓處逼爆隨時出現買樓群組粒聲都冇出過,唔通買年花危險,買樓花安全?

今年頭炮新盤、會德豐旗下啟德Monaco,售樓處人山人海,售樓中心排長龍。   蘋果日報圖片

所謂嘅限聚令,係人都知純粹係限制人民自由嘅工具,正如當日冇疫情爆發嘅初選就不斷被抹黑,相反,直接導致第三波疫情大爆發,帶走了不少人命的建制派慶回歸活動到今時今日特區政府都未有譴責過。因為疫情已經被高度政治化,港版健康碼亦即是安心出行程式即將是下一條戰線,特區政府正打算全力推動強制使用相關程式, 實行香港版社會信用保障系統 。

今日賣樓盛況出現在尖沙咀海港城港威大廈,幾條街之隔就是進行小區管制的佐敦 。今日有55多宗確診, 還有 80多宗初步確診,油尖旺很危險但只限於市民在食肆用餐或者在年宵市場買年花,但卻不適用於在售樓處大排長龍買樓花。

話特區政府已經盡咗全力嘅陳肇始,對於售樓處逼爆隨時出現買樓群組粒聲都冇出過,唔通買年花危險,買樓花安全? 

也許特區政府已經跟來自武漢的武漢肺炎病毒講掂數,話曬大家都係來自中國,唔該畀畀面,千祈唔好搞買緊樓嘅香港人,一定係,除非唔係,否則點解冇人去質疑幾百人在售樓中心排隊等埋樓花安全過去年宵市場買年花?

陳肇始、張竹君、庾慧玲出句聲啦 !十個八個人群組聚餐就要畀你哋公審,幾百人逼埋一齊買樓你地就齊齊做阿叻。「未聽過」、「我唔信」、 「我唔知」、「我睇唔到」、「 唔關我事」,呢幾句係咪聽日記者會諗住同香港人講先? 使唔使筆者幫你哋開返一個阿叻bingo ,睇下你哋仲幾多個金句呀!


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe