想當年前任美國總統特朗普成日話某啲傳媒散播假新聞，點知特朗普落咗台之後，輪到工聯會郭偉強發功，喺立法會視像會議上表示要立法打擊假資訊假新聞。為咗證實假新聞真係好常見，郭偉強就喺立法會會議上發佈咗一單假消息，表示英國報章《衛報》（The Guardian）係世界衛生組織嘅報章。多謝郭偉強親身示範假消息假新聞有幾恐怖，因為只要你夠蠢，就算老掉牙的猜猜我是誰都可以呃你成副身家。
郭偉強嘅邏輯就係英國《衛報》有個衛字，所以就係世界衛生組織嘅報章。根據相同邏輯，《蘋果日報》應該係喬布斯當年創辦；《東方日報》可能同東方不敗有勾結；至於《明報》唔排除係明朝創立或者打算反清復明，社長應該叫做黎明。唔緊要啦，立法會冇曬反對派嘅時候，班建制派議員開會真係好似春田花花幼稚園班同學上堂一樣咁搞笑咁趣緻。
好似郭偉強咁，早一排先至一路揸車一路開會。又話犯法就係犯法，一定要負責嘅，道個歉就算咁仲講乜鬼法治先！至於民建聯嘅梁志祥都一樣咁傑出，竟然開咗八年會都唔識得議事規則。唔怪得堂堂立法會議員會畀假新聞呃到，因為佢哋真係蠢唔係扮㗎。大家仲記唔記得葉劉淑儀畀一個假電郵呃咗50萬？正如阿寶話齋，人類總要重複同樣的錯誤。不過提一提大家，呢個阿寶並唔係Stephy做足十年嘅阿寶，而係機動戰士高達入面嘅阿寶。大家唔好好似郭偉強一樣錯把馮京當馬涼，然後又話人哋係假新聞假資訊。
假新聞假資訊真係周圍都係，只要你有番咁上下蠢就會中招㗎啦。究竟有乜嘢來源嘅消息最唔可信？正所謂近朱者赤，近墨者黑，不如問下郭偉強平時睇開乜嘢報章，咁咪知道邊啲傳媒成日報到假新聞囉，搞到佢又畀人跣咗一鑊。
