眾新聞 Logo
眾新聞 CitizenNews
眾聞

【初選大濫捕】第二名單早有被捕覺悟 義工團工作人員均擔憂 天水連線林進:無人可存僥倖心


警方國安處於本月初大規模搜捕民主派人士,至少 53 名人士被捕,他們被指控籌備和參與去年7月民主派的35+立法會初選,涉嫌違反《港區國安法》中「顛覆國家政權」,被捕人士包括港大前副教授戴耀廷及美籍人權律師關尚義(John Clancy)等負責協調及舉行初選人士。

作為被捕者之一伍健偉其參與初選的二號名單──天水圍瑞華區議員林進表示,早已有被捕、甚至坐監心理準備,他認為這次大搜捕涉獵範圍廣,「就算係我哋呢啲二號名單,甚至票站嘅工作人員,都應該一定要有心理準備,冇人可以懷僥倖嘅心態。」;而初選中排劉頴匡名單第二的沙田區議員李志宏則表示這次「大濫捕」,再次證明港共政府極權的本質,以及在獨裁之下,法律只是當權者用來打壓人民的一個武器,「今日嘅香港,無論我哋係點樣和平、退縮、避諱,政權都係唔會放過我哋。」

林進表示早在2019年參選區議會選舉時已經有被捕的覺悟。    曾港深攝

林進坦言,自警方大規模濫捕民主派人士後,已有被捕的心理準備,因為作為初選二號名單的他,絕對是被盯的目標,但他表示自己的「覺悟」早在2019年參選區議會選舉時已有,「心理準備其實一直都有,唔係因嗰日佢拉完人之後先有被捕、甚至坐監嘅心理準備。但係國安法成立咗之後就更加恐怖,因為我哋無人知國安法嘅判罰會係用咩準則,而國安法最高係可判終生監禁,所以嗰種恐懼係必然嘅。」

二號名單 票站工作人員 都要有被捕心理準備

他直斥《港區國安法》成立目的只為打壓人民聲音,「你見到佢連民主動力一啲純粹幫手嘅角色都拉埋,涉獵嘅層面係非常大,所以就算係我哋呢啲二號名單,或者票站嘅工作人員,甚至係一啲幫過我哋嘅人,都應該要有一定嘅心理準備,我覺得無人再可以懷着僥倖嘅心態。」

林進又指出,自從黎智英被捕後,恐懼早已瀰漫着整個政界,他認為未來一段時間,好難再有民主派陣營人士能在議會內進行抗爭,「而家連最溫和嗰班民主派人士都受到牽連,未來嘅路只會越嚟越難行,唯有相信這可能更推動民間自發去做。」

不過,林進強調「議會戰線不嬲都覺得係無可能」。他指「天水連線」當初答應參加初選,其實是為了向香港人揭露議會只是一塊「遮醜布」,因為無論區議員還是立法會議員,可以做到的事其實好少,所以林進認為這次大濫捕可為香港人帶來啟示,「今次事件可以比香港人清楚見到呢個現實,政治一直以來都係咁黑暗、殘暴,只不過係個政權一路未去到要搲爛自己塊面,大家認清個真相,對於未來嘅民主發展嚟講絕對係一件好事。」

林進(左)為伍健偉(右)參與民主派新界西初選的二號名單出選人。   

與傳統泛民分歧逐步縮少

林進相信初選大搜捕只是政權打壓第一步,港人未來只會面臨越來越大的壓迫,包括民選區議員。他認為港共政權不會讓現時的民選區選員履行整個任期,預計最多只能多做三至四個月,因為公務員宣誓一事在即,他們這批「唔聽話」的議員首當其衝,所以一早有心理準備,「其實由上任嗰刻已經預計到,自己未必做得晒整個任期,但估唔到嚟得咁快,而家唯有見行步。」。

林進曾強調自己屬「本土派」,但他同意現時再談黨派之分,已經沒意思。他相信隨國安法的獠牙逐漸露出,他們與傳統泛民的分歧應該逐步縮小,大家都明白這時候不應再內鬥,需要槍口一致對外,「所以我都好希望全部民主派嘅人士可以坐低,好好哋咁一齊去傾吓、諗吓可以做啲咩共同行動向政權作出回應。」。

自《港區國安法》成立後,他相信每一個香港人與他一樣,每一日起身就會即時查看電話有什麼事情發生,他認為現時社會每一刻都充斥很多好離譜、好荒謬的事,他認為港人當前最重要是心態上的調節,「我哋見到呢一年香港人好似比人打到遍體鱗傷,好似已經唔會反抗。特別係兩場大學戰之後,人心嘅凝聚力都比以往低咗好多,可能係越嚟越多手足被捕,亦可能係因為武漢肺炎嘅關係,抗爭熱度明顯減低,甚至令人會覺得當初2014年嘅無力感,好似又返番嚟。但我認為香港人並唔會就咁罷休,疫情過後,我相信香港人仍然會走上街頭,我哋絕對會再係街頭相見。」

用香港人身份行呢條路

除了已流亡海外的前「民間外交網絡」發言人張崑陽、前香港眾志常委羅冠聰及前立法會議員許智峯,其餘被捕的53名民主派人士雖獲保釋,但所有旅行證件全被沒收,這令人聯想到政權是防止再有民主派流亡海外。「離開香港?我有千萬個原因唔想離開,始終我覺得一旦我離開咗,就好難再同香港人一齊打呢場仗,因為之後如果發生咩事,你都係只能夠用旁觀者嘅身份去睇住件事,我自己係接受唔到呢件事情,所以就算第時條路幾難行都好,我相信點都要有人留返係香港,繼續走落去。就算將來我唔再係議員,但我都想會繼續用香港人呢個身份繼續走落去囉。」

林進最後皺一皺眉毛,清一清嗓子,語重深長地道:「香港人最緊要唔好過份恐懼,繼續做好本份,係唔同嘅範疇繼續抗爭。因為我深信哪裡有壓迫,哪裡就會有反抗,越壓迫得越大,反抗嘅力度都只會越大,香港人要靜待那個能夠一齊反抗嘅時候。雖然每一日都有好多荒誕嘅事情發生,但絕對唔好沉溺係恐懼之中,後生仔就要睇多啲書,好好裝備自己,每個香港人都要做好準備,因為雨傘當年完咗,都冇人諗過5年後會發生場咁大嘅社會運動。」 

林進表示,雖然自己區議員的身份隨時面臨DQ,但仍會盡力履行好現時代議士的責任,為居民、社區發聲。 曾港深攝

初選中排劉頴匡名單第二的李志宏表示,這次初選的大搜捕,再次證明中共、港共政府極權的本質,亦證明了在獨裁之下,法律只是當權者用來打壓人民嘅的個武器,「今日嘅香港,無論我哋係點樣和平、退縮、避諱,政權都係唔會放過我哋。」

李志宏出席民主派回應初選大濫捕的記者會。    港台網上直播截圖

同樣作為初選二號名單的他,也表示早有被捕的心理準備,又指現時香港的政治氛圍籠罩着強烈的白色恐怖,

無一個人係唔驚嘅,大家驚係明白 ,但驚完之後要做啲咩先係最重要。

他認為議會戰線已是不設實際,每個人都應該思考一下在什麼範疇可以繼續抗爭,「其實仲有好多戰線,工會戰線、社福界、勞顧會等,我覺得每個人都可以做得更多」,他呼籲港人不要太過悲觀,不同方法都可以延續抗爭運動。

李志宏認為雖然現時社會環境非常黑暗,但香港人不應該自我設限、退縮及自閹投降,否則不知不覺間便會喪失作為香港人的靈魂。

「又傾又砌路線已經唔再可行,法治嘅制衡已經消失咗,」他直言在中共政權眼中,香港人生存本來就是原罪,「莫須有」也變成香港人最大的罪名,所以港人再無退縮的理由,「今日搞初選就話犯法,如果聽日同你講鬧政府就係犯法,再者有一日我哋講『香港』呢兩隻字都係犯法嘅時候,唔通我哋連『香港』呢兩隻字都唔講咩?」。

李志宏(右三)去年曾參與勞顧會選舉,表示希望打破勞顧會長久以來的不公。   張凱傑攝

李志宏認為現時港人需要認清恐懼,然後直視恐懼,最後克服恐懼,又以掃垃圾作比喻,「就好似我哋如果將啲垃圾掃入梳化底,啲垃圾仍然存在」。面對恐懼時,我們需要「無懼」的心,「真正嘅無懼並唔係指一個人咩都唔驚。我地唔係聖人,作為凡人,我地每一個人都分享同一樣嘅恐懼。但當一個人即使恐懼,但依然選擇繼續堅持落去,為左人類共同信仰既普世價值而奮鬥,咁樣,先至係真正嘅無懼。」他亦呼籲民主派放下過往恩怨合作,共同為民主運動奮鬥。 

黎銘澤、李軒朗及何致宏同屬初選名單第二參選人,他們同樣表示已有被捕的心理準備。 

現在基本上咩都做唔到

港島區初選彭卓棋名單第二參選人、中西區區議員何致宏則表示現時情況非常被動,「基本上咩都做唔到」,除了憂慮將來會被捕之外,他亦擔心所有與初選有關連的人士亦會遭殃,包括義工團。

他批評政權這次大搜捕缺乏法理,並質疑「建制派都有初選制度啦,你唔拉埋佢哋?」;九龍西初選馮達浚名單第二參選人李軒朗亦表示,由當初參加初選時,已有被捕的覺悟,當時所有參選人亦都有開會談論過當中的風險,只是想不到中共會以「顛覆國家政權」為由將他們拘捕,「只係一個可用自由意志揀選自己心儀民主代議士嘅活動,點樣可以顛覆到國家個政權呢?」;至於新民主同盟、新界東初選參選人范國威名單第二參選人黎銘澤則指,現時政府的決定已經不可理喻,又表示他的家人非常擔心他會成為政權下一個「祭旗」對象,籲同路人「共勉之」。




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe