【撰文：中西區區議員葉錦龍】
政府首次引用《預防及控制疾病（對若干人士強制檢測）規例》（第599J章）局部封鎖油麻地，範圍東至吳松街、南至南京街、西至炮台街、北至甘肅街。封鎖行動由1月23日凌晨4點起計，要在封鎖區內所有人做完強制化驗，並差不多出曬報告後先可以解封，之前做咗化驗報告唔計，要再做過。任何在14日內去過封區範圍兩小時以上的人，都要在1月23日起做強制化驗。
政府行動的目標在兩日內解封區域，但返唔到工的人，政府唔會賠，「政府希望僱主能酌情處理，不要扣減員工的薪金和福利」。
實際出現問題如下：
一、 一早漏曬風出去會封區但又唔肯認，收到風嗰班要走都走曬，分分鐘全港大感染，政府邊度係同市民同心抗疫？
二、講咗成年化驗完唔係等於以後唔會病，要配合啲人封區先有用，依家先知？
三、但係幢幢大廈啲污水渠都病毒超標，又全部都係唐樓劏房。為何唔係全區撤離去隔離營，而係封區要啲人留喺度，要啲人與病毒共舞，驗完都係會交叉感染？當初講到係威係勢，嗰堆停車場臨時屋起嚟擺？
四、點解唔一早喺跳舞群組大爆發時諗定點做？點解明明係因為未封曬個關而搞到爆發，但係要講到係因為南亞人士搞到爆發？
五、據油尖旺交運會主席陳嘉朗指，封鎖區內最少包括三條紅van線嘅總站，點安排？
六、封區而返唔到工的人，如果因為咁老闆扣糧扣假扣勤工，甚至炒人冇工開，政府負唔負責？
七、因封區而開唔到工的商户、攤檔損失點計？
八、劏房户家中沒有洗衣機，如何處理衣物換洗？住戶的垃圾處理，當普通垃圾還是比對醫療廢料安排？社區內的狗狗要出街去廁所怎麼辦？
九、所有安排計劃事前完全冇問過區議員、社區NGO，咁多日以來，當區民政處十問九唔應，仲要work from home。據現場消息指，政府人員好多都唔知頭唔知路，反而議員卻被居民問嘢答到口乾，但係佢哋啲開支同助理啲人工claim錢卻比民政處拖好幾個月未找，如帶銀包返工。究竟政府對於區內的人口分布、流動、居民關注問題所知幾多？民政處又做咗幾多嘢協調指揮部門工作？
十、咁既安排，既限制人權又未必做到控制疫症，想點？
為避免今次混亂，我建議如下：
一、一早就預先講定如果封區個SOP（按：standard operating procedures，標準作業流程）會點做，唔好鬼鬼祟祟凌晨4點封。在大家知道SOP下，先做封鎖，並且同時通知包括議員在內的各部門、社福機構及居民，後安排入場。（1月6日大搜捕識安排1000個警察拉人，封區叫警察即時拉封鎖線係咪佢地唔敢做？）
二、封區同時，應馬上安排臨時住宿/隔離設施畀所有封鎖區內既人住，直至有化驗結果同埋區內已無病毒（撤離居民配合區內全面消毒，安排好居民住宿及交通的話，反而唔駛運咁多嘢入區）。
三、居民因封區而導致的損失，政府應承諾包底。政府直接補償因封區而未能營業的商户。（口講保就業、實則送錢畀老闆，不如跟返受影響居民人數同人工，畀返相應補貼畀居民同公司）
四、取消潛在帶毒入關，每日5000人的回港易計劃。（你唔封關，就到人地封你關）
五、建議非本地居民的豁免檢疫人員的安排，應比對外地對航空機組人員的安排：訪港期間限酒店內居住直至離港，以指定點對點運輸送至關口。建議本地居民的豁免檢疫人員的安排，在外地期間須全程居於酒店直至離開外地，這樣既可確保緊急運輸，又可以確保本地居民的入境權利。
（原刊作者facebook專頁）
