眾新聞 Logo
眾新聞 CitizenNews
眾說

挪威疫情(1)──挪威用心歹毒?!


1月14日,挪威藥品管理局公佈,有23個住喺護理院嘅年老院友接種輝瑞疫苗後死亡,其中13人接種後出現過副作用,佢哋全部係80 歲以上,有啲仲超過 90歲。輝瑞疫苗嘅臨床測試只係喺18–65 歲群組,所以有嚴重病患嘅虛弱長者,會唔會有嚴重副作用甚至死亡? 挪威藥品管理局正調查原因,建議醫生仔細考慮邊個適合接種。

不過,藥品管理局強調呢啲病例好少見,死亡事故亦未必同疫苗有因果關係,無證據顯示疫苗唔安全,接種風險好低,叫挪威人安心;挪威人真係好信任政府,處之泰然,完全冇恐慌。不過,事件引起國際關注,特別中國和俄羅斯,唔安心嘅,會唔會係挪威政府?原來中國《環球時報》發文,話中國衛生專家呼籲暫停替長者打輝瑞疫苗,NRK(挪威國家電視台)第一時間出咗篇長報導回應,就係呢篇報導,有理由相信,挪威政府絕對要擔心,點解?

NRK報導全力反駁《環時》

據中國《環球時報》,中國衛生專家話唔好同長者打輝瑞疫苗,但NRK呢個國營電視台,除咗搵挪威疫苗專家出嚟反駁《環時》,仲搵埋挪威藥品管理局其中一個部門主管,主管話《環時》報導失實誇大,不特止,仲有挪威國防學院做嘅軍官,用咁嘅檔次咁嘅陣容反駁,你話中國會點睇?

「《環球時報》嘅講法,純粹係政治宣傳⋯⋯係政治宣傳。當然係政治宣傳。」

先睇下NRK報導標題嘅意思:〈利用挪威療養院死亡事件來斷言西方疫苗不安全〉,吓?話中國「利用」?!再睇下啲副標題:

NRK報導(18.01.2021)截圖

意思係「《環球時報》嘅報導,純粹係政治宣傳⋯⋯係政治宣傳。當然係政治宣傳。」挪威藥品局嘅部門主管Steinar Madsen,將中國嘅專家忠告,話係中國嘅政治宣傳,仲覺得好重要,連續講咗「政治宣傳」3次。

喺NRK報導,國防學院做嘅軍官Geir Hågen Karlsen 話《環時》報導嘅對象係中國人,目的係顯示中國政府比西方國家更好,更成功,技術更先進。另外,挪威嘅疫苗專家Gunnveig Grødeland 話,喺呢場猶如登陸月球競賽嘅疫苗競賽,中國同俄羅斯否定輝瑞疫苗,嚟講中俄嘅抗疫好故事;佢仲話,病毒嚟自中國,之後引起世紀疫情,所以中國要傾舉國之力,輸出中國製疫苗去非洲同埋一帶一路國家,用疫苗外交,嚟淡化後果喎。

吓,NRK竟然全方位反駁中國,中國會唔會話挪威挑機?如果用中國嘅思維模式,同埋特區政府近日已同國家一體化嘅字詞,NRK嘅報導簡直係無中生有,係將疫苗成效政治化,用諸心論惡毒揣測中國溫馨提示世界嘅動機,仲將中國善心幫助發展中國家嘅疫苗出口污名化,不特止,仲繼續番炒病毒嚟自中國;喺中國眼中,挪威國營NRK用心歹毒。

挪威政府而家同中國傾緊貿易協議,正係最後衝刺,挪威咁挑機,中國點可以唔出啲戰狼反制措施?挪威政府絕對有理由不安。

附圖一:中國《環球時報》報導截圖
附圖二:NRK報導標題截圖

 


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe