眾新聞 Logo
眾新聞 CitizenNews
眾聞

【准開花市唔准踢波】懶理封場 30人花墟球場鬥波 波牛:幾千人行花市都得啦,踢波有咩問題?


疫情持續,政府一再延長社交距離措施,運動場和足球場等康體場地繼續關閉。早前特區政府「打倒昨日的我」,宣布在15個球場原址復辦花市,令「腳痕」多時的波牛怒氣沖沖,同問:「球場用嚟賣花都唔畀踢波?」球場重開無期,有不少市民已經按捺不住,跨越封鎖線,用「自己的方法」做運動,有波友表示對政府的決定感到相當不滿,反問「幾千人行花市都得啦,我哋十幾條友踢波有咩問題?」

下午時分的花墟足球場,有不少市民跨越紅白色封鎖膠帶進場踢波。  曾港深攝

旺角花墟足球場地理位置好,設施亦是康文署轄下足球場中保養得最好之一,一向是波友的首選球場。記者今日(26日)到花墟球場,發現有不少人「偷雞」跨越康文署圍堵球場的封鎖膠帶和鐵馬踢波和踏單車等,大部分人均沒有戴口罩,其中一個足球場更有人「跟隊」踢波,球場內外人數大約為30人。

與朋友到場「跟隊」的葉先生表示,政府寧願重開球場復辦花市,也不願重開球場供市民使用,形容事情荒謬及本末倒置,「球場本身就用嚟踢波嘅,你開嚟搞花市,Okay,冇問題,但你應該都要開返比人踢波囉。因為照政府嘅道理,幾千人行花市都得啦,我哋十幾條友踢波又有咩問題?」

大部分踢波的市民並沒有戴好口罩。   曾港深攝

葉先生認為政府漠視港人的抗疫疲勞,防疫政策「離地」,「試吓叫班高官同啲差佬,禮拜六、日去大東山、龍脊、浪茄嗰啲睇吓,應該同搞花市都係差唔多人數㗎咋!你要去捉限聚令嘅話,捉到佢哋手軟都仲得!咁點解啲人會去晒行山?就係因為所有運動場、球場閂晒囉!」。他認為疫情下港人無地方消遣,難忍長期屈在家中,導致離島及郊外人頭湧湧,可能出現「行山群組」。葉先生直言,「唔通踢波就會感染,爬山就唔會咩?而家咁多冇源頭個案,你可以點避啫?」

葉先生這天「跟咗兩隊波」,人數約30人,大部分人士均沒有戴上口罩,球場的龍門架已被康文署拆去龍門網,並以紅白膠條封鎖,但場內的人仍然踢得非常盡慶。他又表示這天球場的人流已經比平日少,故希望在運動時,順道呼吸新鮮空氣,又指不戴口罩踢波是他們的共識,不過亦不反對有人戴着口罩踢波。

花墟足球場的龍門已被康文署除去龍門網,並以紅白膠條封鎖,但仍難阻波友踢波娛樂。   曾港深攝
記者目測下午前後約有30人在球場踢波,休息時大部分人都脫下口罩。  曾港深攝

球場的另一邊,42歲的廖先生與就讀小一的兒子在練習射門,他表示除了「腳痕」,是想趁這星期回暖,與小孩一同「出返身汗」,又提到小孩因為長時間停課的關係,已經很久沒有上過體育堂,有必要讓他「郁動吓個身」。

疫情下復辦花市,廖先生不太認同,「因為而家個疫情係沒完沒了,每日都至少幾廿宗,仲有好多都係冇源頭,即係話你落球場有機會中招、搭巴士、搭地鐵都有機會,所以其實根本就連花市都唔好搞。」

廖先生與就讀小一的兒子在練習射門。曾港深攝

廖先生指政府在決定防疫措施時舉棋不定,「呢啲得、嗰啲又唔得,咁嘅做法好唔fair喎。」又認為球場上進行的活動風險會較舉辦花市少,「我頭先喺花墟道行過嚟都已經見到好多人行街買花,可以想像到花市當日人數會有幾多人。」他希望政府逐步開放部分球場讓市民做運動,最多限制入場人數以及運動種類。

花墟的花店生意門庭若市。   曾港深攝

廖先生坦言在球場踢波有一定風險,他不會參與多過二人聚集的球類運動,亦不會與陌生人「鬥波」,「如果十幾廿人鬥波,其實都有危險,好似開角球咁,個龍門實會嗌㗎喎,『前柱、後柱』,大嗌嗰陣啲口水都一定容易傳播細菌,同埋亦都無人會去檢查體溫,你去餐廳起碼都有個最基本嘟一嘟,但你球場唔會有,就咁行入去就得。」

球場外有小童除罩踩單車。   曾港深攝

除了足球,花墟足球場內亦有不少市民除罩做動運動,如跑步、健身、踩單車、打排球等,有人認為天氣和暖是適合做運動,有人亦表示「吊頸都要唞下氣」,到來伸展筋骨。

政府於各足球場復辦花市備受抨擊,有傳媒引述消息指,當局研究當疫情緩和時,准許公眾進入球場踢波,又傾向開放戶外運動場的跑步徑。但目前疫情未見回落,政府更要「突襲式」封區,康體設施何時解禁仍屬未知數。

身穿橙色反光衣的工作人員,正為復辦花市作準備。   曾港深攝



請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe