眾新聞 Logo
眾新聞 CitizenNews
眾說

專家也投降


中共和港共政權用心良苦將所有民主派議員逐出議會後,實在為香港人帶來無限歡樂。民建聯立法會議員李慧琼在立法會大會上表示,科興疫苗未能依時供應香港,歐洲也有可能收緊疫苗出口,表示聽到有所為市民擔心疫苗會有水土不服,質疑政府為何不購買國藥疫苗。李慧琼真係好好笑,竟然覺得注射歐洲研發的疫苗會有水土不服情況,唔通李慧琼以為疫苗係食而唔係打,所以驚會水土不服?今次大鑊了,如果打疫苗都會水土不服,咁樣美心集團可以執笠了。

李慧琼Facebook影片截圖。

藥物同疫苗會唔會有水土不服呢個問題呢?專家都應該會搲爆頭。今時今日醫管局提供嘅藥物屬於全球採購價低者得,產地歐美澳加中日韓印度都有,有冇聽過人食完不同國家出產嘅必理痛之後會有水土不服呢?真心相信專家都未聽過。流感疫苗呢一樣係由外國藥廠生產,未聽過有類似問題。

至於武漢肺炎疫苗呢 ? 李慧琼表示注射國藥疫苗更好,因為唔會有水土不服問題。唔通李慧琼心入面諗緊武漢肺炎來自中國,既然病毒首先來自中國,疫苗也應該用國產最好?不過呢個講法會唔會違反國安法呢,我就唔知喇,我淨係知道就算武漢肺炎來自中國武漢又點?就算係英國阿斯利康疫苗都係一樣針對中國武漢肺炎病毒,除非隻病毒過咗一年,去過英國同埋南非變種之後,好似部分香港人咁變咗一個ABC, “Well, we 唔LiKE呢D Chinese Vaccine 囉”,所以不同國家生產嘅疫苗都有啲唔同。

定抑或疫苗由歐洲運到香港過程咁長,李慧琼擔心疫苗會暈機浪所以水土不服係講緊隻疫苗而唔係香港人?如果係咁真係大鑊啦,咁樣香港人應該用返土產嘅疫苗,搵香港藥廠生產算數啦,如果唔係我驚過咗條深圳河隻疫苗都會水土不服喎!

根據同樣道理,我真係好擔心過去一年不斷開拓新品牌嘅美心集團為咗爭取市場份額,不斷透過全新品牌希望香港人唔知唔覺幫襯咗美心,但係呢啲全新品牌好多都係內至外國勢力,例如近排非常熱門嘅燒肉店就係來自日本呀!咁樣香港食完美心集團全新品牌燒肉like之後水土不服呢?穩陣啲香港人都係食返龍門冰室較安全。既然係咁大家唯有繼續杯葛美心集團全新外國勢力品牌,因為打疫苗都會水土不服,更何況係食嘢呢,都係乖乖哋食返百分百土產嘅黃店安全啲 。

作為民建聯主席嘅李慧琼今次嘅破格言論實在令人嘆為觀止,原來打疫苗都會驚水土不服。喺沒有反對派嘅日子,立法會真係越嚟越有趣。 既然曾志偉加入TVB 成為高層,係時候搵埋一班立法會議員齊齊主持開心主流派。郭偉強當然係負責開心字典環節,李慧琼當日做唔成Now TV節目主持,今次加入日日聲稱更多年輕人支持嘅 TVB,同曾志偉郭偉強一齊成為開心主流派嘅重要角色,相信TVB收視終於有救啦!


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe