傳說中有一隻武漢肺炎疫苗好巴閉，唔單止可以預防武漢肺炎，打完之後更加會覺得好舒服，同埋有啲興奮，有人更加話打完之後會好瞓咗添。講到呢度，你係咪都好想接種呢隻疫苗呢？冇錯，呢隻就係過去幾日不停有人吹風，講到天上有地下無嘅國藥疫苗啦。究竟呢隻疫苗有乜咁特別，等我哋睇一睇佢嘅真相先。
國藥疫苗係咪好特別呢？當然佢有佢嘅特別之處。技術方面係咪好特別？答案唔係。國藥疫苗都係用緊最傳統嘅滅活疫苗技術，即係同科興生物嗰隻完全一樣。唔通係成效特別勁？如果你問專家，佢哋會同警察公共關係科一樣，話你知我手頭上冇資料，因為國藥疫苗依然未有第三期臨床數據。咁樣有咩嘢係佢嘅特別之處？答案就係特別貴。國藥疫苗價錢要708蚊；美國Moderna疫苗索價388元港幣；輝瑞疫苗就要308蚊；最平就係俄羅斯疫苗，只需要115蚊。但係點解呢隻未有數據價錢又最貴嘅疫苗，建制派咁趨之若鶩呢？過去一段時間，力撐呢隻疫苗嘅包括有李慧琼、湯家驊、盧寵茂、黃國健、屈穎妍等等，更加有人批評負責審批疫苗註冊嘅專家小組係咪眾人皆醉我獨醒，點解堅持唔可以使用未有第三期臨床數據嘅疫苗。其實負責審批疫苗嘅專家小組，全部都係特區政府自己人，唔通你以為過去一段時間批評特區政府嘅何栢良會係專家小組成員之一咩？明明成立呢個小組已經好似少林足球咁樣「球證、旁證、足協、足總、足委，全部都係我嘅人，你點同我打呀？」但係呢班建制派竟然都唔滿意，不斷喺各個途徑施加壓力，希望專家小組跪低，喺未有第三期臨床數據嘅時候就要批准相關疫苗可以註冊。究竟佢哋會有乜嘢考慮呢？當中有冇人趁住過去幾日股市波動，大手買入國藥控股股票，希望賺番筆呢？我希望佢哋冇啦，因為國藥控股算係咁多隻本港上市醫藥股之中，走勢比較疲弱嘅一隻。大概一年前，武漢肺炎開始爆發嘅時候，國藥股價曾經上到去29蚊樓上。隨著疫情發展，竟然喺舊年3月跌到去14.7嘅低位。之後雖然慢慢回升，但係20蚊呢個心理關口，似乎仲未能夠企得穩，今日收市報19.28元，跌咗3 %。要買疫苗股都買康希諾生物，一年之間大概65蚊升到最高288蚊，以今日收市價計，就算今日大跌7%，依然升咗三倍有多。買國藥唔使蝕錢都偷笑，想大賺一倍，似乎有難度喎。
其實香港特區政府面對疫苗問題已經做到愛國愛港。復星疫苗雖然喺歐洲生產，但係交由復星代理，算係半隻內地疫苗。至於科興疫苗真係唔爭氣，搞到而家都仲未可以入貨。留番一隻疫苗配額畀英國製造嘅阿斯利康牛津大學，等藍絲權貴有得打是常識吧。唔通你以為班富貴藍絲個個真係咁愛國咩！嗰個一家大細揸住外國護照係外國人就真。一隻仲未有第三期數據嘅國藥疫苗，建制派人人趨之若鶩，係咪真係咁好，你唔知，我唔知，甚至乎國藥控股自己都未知，因為一句到尾，第三期臨床數據未公佈。大家唯一知道嘅就係呢隻疫苗價錢最貴。唔知會唔會因為建制派全力追捧，與此同時國藥控股唔夠貨，最後香港政府需要高價買入呢隻仲未有第三期臨床數據嘅疫苗呢？我真係唔知喇，不過即使香港買入15000萬劑疫苗又點樣？區區一個香港唔通真係能夠撐得起國藥控股嘅股價咩？除非香港人真係要天價硬食呢隻本身已經貴人哋差唔多一倍嘅國藥疫苗啦。不過國藥控股咁大隻，真係要賺多幾多先至托得起個價，我真係唔知啦。
