眾新聞 Logo
眾新聞 CitizenNews
眾說

青姐有難了


近排香港股市咁波動,周圍都係所謂嘅股神,財演應該都發過豬頭,因為成日有人訪問佢哋後市睇法。如果有一日林鄭月娥唔做特首,其實佢真係可以走去轉行做財演。睇到佢關於封區檢測嘅回應,證明咗佢絕對有潛質做新一代財演。今次青姐大鑊喇,你嘅語言藝術同林鄭月娥比真係冇得比。

北角封區強檢,林鄭出巡。周滿鏗攝

第一次佐敦封區,搞咗兩日,驗到13宗確診,特區政府即刻攞全民檢測數據喺度自high,話行動好成功。之後走去搞油麻地碧街,結果得一個確診個案,林鄭月娥就話一個都不能少,不能夠看小任何一個感染源頭。好啦,搞完油尖旺區,就去搞港島區,今次去到福建幫聚集地北角錦屏街。搞咗成晚,一個確診個案都搵唔到,竟然林鄭月娥又搵到藉口出post自high,表示一個確診個案都搵唔到就係成功小區清零。

林鄭月娥你真係好叻呀,不過只限於語言偽術。搵到多個案就表示行動有用,搵唔到個案行動一樣唔係失敗。你嘅講法真係啱曬佢做財演。見到個市升你話有機會破頂又得,但係又可以話小心獲利回吐。就算你嘅推介蝕到人哋阿媽都唔認得,都仲可以話因為對方入場時機唔啱,之後一日反彈少少就話琴日買就係最好時機,你錯過咗唔關我事。

林鄭月娥面對勞民傷財嘅突發封區大龍鳳,擁有嘅唔係阿Q精神而係財演天生嘅老吹精神,無論搵唔搵到確診個案或者搵到幾多宗確診個案,我都可以話行動成功。搵到就話一個都不能少,搵唔到就話成功小區清零。就算匯豐跌到28蚊林鄭月娥都唔會有一滴眼淚,仲可能會恥笑你點解唔去買熊證。

究竟今年股市會係繼續破頂定係已經見咗頂準備大跌,唔好問我,走去問林鄭月娥啦。青姐係時候退隱江湖,等林鄭月娥發揮佢亂噏當秘笈嘅絕世神功發揮喺股票市場,相信以佢獨一無二嘅嘴臉肯定可以創出一番事業。各位財演,唔想咁快失業,記得快啲向林鄭月娥請教語言偽術啦!


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe