眾新聞 Logo
眾新聞 CitizenNews
眾說

這夜你們很葡萄


美聯社照片

自從英國政府宣布BNO 5+1計劃之後,建制派人人群起批評。有人說移民英國的人最終也會回到香港;中聯辦表示英方試圖將大批香港人變成二等公民;曾經跣了一對夫婦一鑊,叫他們賣樓買匯豐的湯文亮,也出嚟抽水,表示透過這計劃移居英國的香港人質素不會太高。這一夜,我見到你們人人都很葡萄。移民英國計劃,很想要吧。只可惜你們不是移不走,就是想走也不能走,所以便在葡萄其他能夠透過這計劃離開香港的人。其實移民又有乜好怕喎,香港每日都在接收150名新移民,又唔見你哋鬧爆對方,問佢哋做乜落香港做二等公民?英國只不過是提供途徑給香港人移民,你們就在呱呱嘈,其實係人都知比起持有BNO香港人,你們更想走,只可惜這些機會不是屬於你們的。哈哈哈!

其實這個BNO 5+1計劃只不過是一個英方單方面提出的計劃,走與不走,香港人自己決定。正如全球各地也有提供各式各樣移民計劃,包括投資移民等等。如果移民可恥,那麼天下間所有移民顧問全部都是協助他人犯罪。至於是否去外國做二等公民,關你乜事。譚耀宗長子去澳洲做二等公民又唔見你咁肉緊?林鄭月娥一家四口有三個都是外國二等公民,你哋又唔去譴責?其他特區政府官員議員不知有幾多人身邊另一半擁有外國護照,你又唔去恥笑佢哋遲早返香港?點解其他香港人尚未動身,你哋就要咁緊張?我知!因為你哋連走嘅機會都冇!

林鄭月娥一家三男子攞住英國護照,又唔見建制派譴責。

BNO 5+1計劃是一個門檻較低,但未算很寬鬆的計劃,因為相關人士依然要在英國生活六年才可以取得公民資格。但這批建制派的反應實在大得令人懷疑。諗深一層,又係喎!你估經歷2019年嘅香港,佢哋想走使唔使問過阿爺先?大家仲記唔記得鄭若驊當年喺英國跌親,冇第一時間返香港治療,喺英國逗留一輪,之後竟然去咗大陸再返香港。係囉,跌親隻手啫,香港大把骨科醫生,點解當時要留喺英國,之後又咁奇怪去到大陸治療呢?唔好意思,我又要扮警察公共關係科,表示我手頭上無資料。

一個最快要六年後才會食糊的移民計劃,一推出,成班建制派即刻呱呱嘈。其實你們這一刻的心情我是明白的。比起持有BNO的香港人,你們身邊家人都持有外國護照,甚至已經移民到外國了。只可惜你們的家人可以走,你們這麼愛國,想走冇咁易,走去大灣區就有你份!部分低質建制派可能全家人都是持有特區護照,又唔夠錢搞投資移民。見到身邊黃絲們個個隨時可以執行李起飛,自己只能望住美好的大灣區,在紫荊黨成為執政黨之後,真真正正做政界二等公民。葡萄他人有得走,你們的心情我是明白的。唔緊要啦,出得嚟行,預咗要還,做得建制派就係要擁抱大灣區㗎啦!你哋去咗肇慶買樓未啫?未嘅話好快手啦!如果唔係第時紫荊黨攞曬立法會同區議會議席,你哋想上車可能要去到青海先負擔得起。揸住匯豐嘅就可憐啲,屋企股票多到可以貼幾層牆紙。人哋去到外國做二等公民但係得到自由,都好過你哋留喺大灣區唔知做第幾等公民嘅。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe