全國政協唐英年昨日向傳媒透露，早前到深圳接種武漢肺炎疫苗的全國人大代表和政協委員，會到深圳接種第二劑疫苗。只可惜這個全體原來有漏網之魚，就係佢自己。唐英年表示由於自己超級敏感，對流感疫苗有過敏反應，因此未有到內地接種武漢肺炎疫苗。嗱，唐英年今次我就唔撐你啦！我分分鐘擔心你犯咗國安法㖭！
而家建制派個個吹捧到國藥疫苗天上有地下無，盧寵茂表示打完之後感覺好舒服，仲有少少興奮；譚耀宗就話打完之後好瞓咗。建制派人人都話唔使等第三期臨床數據，快快手手引入香港，盧寵茂甚至話唔通跳降落傘都要第三期臨床數據咩！而家建制派嘅主調就係將國藥疫苗當成救世神藥，邊個批評國藥疫苗隨時畀人話反中亂港。但係唐英年竟然為咗個人利益，竟然話唔夠膽注射國藥疫苗，實在太過份呀！唐英年你記住，冇偉大嘅祖國，就唔會有你，呢個係黃金機會畀你報效國家。如果好似你咁有嚴重敏感，但係注射完疫苗之後都冇出現敏感反應，咁咪即係話國藥疫苗好安全囉！你仲可以做埋生招牌㖭！估唔到唐英年咁貪生怕死，竟然擔心打完國藥疫苗之後會出現敏感反應，你實在太睇小內地嘅醫療專家啦！政府成日吹話國內嘅醫療專家好偉大，如果你打完針出事，我相信佢哋一定會為你即時搶救，保證你可以行得返香港。到時你又可以同人講內地醫護人員質素真係好高㗎，快啲請佢哋來取代香港班黑醫黑護啦！
可惜唐英年貪生怕死，又浪費咗呢個黃金機會。唐英年你實在太過份呀，你知唔知國藥控股嘅股價跌咗幾多？而家只係19.2元，比起2009年上市招股價16元只係高咗兩成咁大把，同歷史高位29蚊仲差一大截，你叫一班國藥股東情何以堪。作為全國政協，你嘅責任就係報效國家，應該將個人榮辱放埋一邊。拒絕接受功效超越預防武漢肺炎，隨時係有病醫病，冇病補身嘅國藥疫苗，你實在太令大家失望喇！
唐英年你知唔知而家特區政府用盡方法推廣武漢肺炎疫苗，晚晚電視台黃金時段都係播緊關於武漢肺炎疫苗廣告，其他建制派更加洗橫手，希望製造壓力，逼疫苗專家小組在未有第三期臨床數據嘅時候，夾硬批准武漢肺炎國藥疫苗可以喺香港打尖使用。只可惜你嘅自私行為實在令國家失望，唔怪得昨日國藥控股股價再次下跌。相反，康希諾生物嘅股價就成功突破300蚊大關，其他二線醫藥股好似綠葉製藥同埋山東新華製藥亦都齊齊急升，國藥控股就斯人獨憔悴。點解呢？因為自己人都唔撐自己人囉！
