眾新聞 Logo
眾新聞 CitizenNews
眾聞

楊潤雄指校園唔嗌得時代革命 「變革香港」得唔得?「要睇返個內容同背後理念」


教育局昨日向學校發通告,就維護國家安全提供行政及教育指引。教育局局長楊潤雄今早出席港台及商台節目,以及在出席立法會後接受記者提問回應事件。眾新聞整合部分問答內容:

• 指引建議,若學生在校內佩戴政治訊息的飾物、叫口號、拉人鏈等,學校應立即勸止,如有需要可諮詢警民關係主任,如遇上嚴重或緊急情況則報警。

商台主持:「時代革命」唔嗌得啦係咪?
楊潤雄:係係係。
商台主持:咁「變革香港」(民建聯近日提出的口號)嗌唔嗌得?
楊潤雄:呃哈哈哈,睇返佢個內容,睇返佢咩情況之下,佢背後個理念係咩嘢。

港台主持:指引說若學生在校內佩戴政治訊息的飾物、叫口號、拉人鏈等,學校應勸止,如遇上嚴重或緊急情況則報警,具體是如何?

楊潤雄:舉例如果學生戴有政治訊息嘅飾物,學校要制止,要教導佢哋點解唔適合。至於會否違法,就要睇講咩,例如明確係港獨或鼓吹危害國家安全,咁梗係唔得。有違法嘅話,可以搵警民關係主任或者學校聯絡主任了解先,唔係即刻要報警,最重要係盡快通知家長,係希望教好學生,唔係拘捕學生。例如叫政治口號、政治宣傳等,學校應該制止,要睇內容模式,係「貪得意」定有目的,學校要了解咗先。如果有時唔知係咪違法,可以搵警民關係主任傾。

港台主持:如果學校覺得冇違反國安法,但當局覺得有,責任係咪都落喺學校度?
楊潤雄:學校有責任唔畀危害國家安全嘅事喺學校發生,而最終邊個要負責,要視乎情況。學校要安排教職員了解國安法,應該可以做到決定(判斷有否違反國安法),如果唔明就搵警民關係主任。

• 國家安全教育框架要求初小學生也要認識《香港國安法》

記者:要初小學生理解國家安全教育會否太困難?
楊潤雄:由小學開始絕對唔會太早。喺小學階段,可以先教簡單嘅,到中學階段可以再深入研究,例如法例條文。總體來說,希望培養學生自覺負起維護國家安全的責任。

記者:局長你自己講唔講到分裂國家罪同顛覆國家罪刑罰分別係幾多呢?
楊潤雄:我唔知道你問呢個問題係做咩,因為我唔係一個法律專家,亦唔係負責執行呢條法例嘅官員,所以我唔會回答你問題。
記者:如果你都答唔到點解小學生可以答到呢?
楊潤雄:(無回應)

• 指引稱學校應防止政治活動入侵校園

記者:初中課程框架其中提及初中生要學國家安全的13個領域,第一個是政治安全,但教育局指引指出學校裏不應討論政治(指引指防政治活動入侵校園),是否有矛盾呢?
楊潤雄:成個課程係由課程發展議會同考評局一同制訂,目前正向學校進行問卷調查,當中係一啲專業嘅討論,我會交畀專業嘅同事做詳細研究。你提及嘅問題,我們講緊嘅係學校係唔容許有政治宣傳嘅活動,而喺教學上呢個絕對唔係政治宣傳活動,係正正式式教導總體國家安全的概念的重要一環,兩者之間沒有衝突。

記者:老師如果沒有停止學生一些政治活動,學校是否須負上責任?如不容許這些事情發生,是否限制了學生的言論自由?
楊潤雄:我哋一直都話,唔希望有政治宣傳活動喺學校出現,因為對學校製造比較安靜嘅環境畀學生學習,絕對冇好處,呢個與言論自由無關,喺學校當然有好多議題可以討論。言論自由從來都唔係冇限制,都要合乎法例、合乎社會規範。所以睇唔到尋日發出嘅指引會對言論自由有任何規限,只係跟法例要求去做。




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe