眾新聞 Logo
眾新聞 CitizenNews
眾說

清算易


攬炒之母林鄭月娥一日到黑諗住清算香港專業界別,一句到尾,因為自己唔專業,所以憎人富貴厭人貧 。筆者曾經講過,特區政府清算專業界別嘅方法就係搵外行人管內行人,因為呢班人根本對相關專業界別毫無感情,所以唔介意搲爛塊面,為咗幫政權擔任一個小丑。香港最經典嘅例子當然包括就連建制派都頂唔順嘅食物及衞生局局長陳肇始,仲有教育局局長楊潤雄。一個護士管醫生你話好唔好笑?定係搵會計師管教育可笑啲?

陳肇始周五到立法會衞生事務委員會講解引入非香港培訓醫生的新機制。林勵攝

周四(4日)林鄭月娥提出稍後立法容許非本港受訓醫生回香港執業。呢個計劃有乜嘢目的,大家心照。周五陳肇始在立法會表示,事前沒有諮詢過負責醫生註冊及執業的醫委會,至於誰人決定認可醫學院名單,就係佢自己。陳肇始你好叻叻呀!未讀過醫嘅你竟然可以走去管醫生,決定邊間大學畢業嘅可以返香港豁免考試,你係咁叻,不如你帶頭入隔離病房醫武漢肺炎啦!坦白講,護士並唔一定冇醫生咁叻,亦有自己嘅長處,並唔係醫生能夠取代。其他醫療範疇例如物理治療、職業治療、言語治療一樣,每個專業界別都有各自嘅獨特之處。而家搵一個未讀過啲嘅護士去管醫生,連醫委會都可以唔理,會有什麼後果,你話呢?陳肇始喺立法會冇曬反對派嘅時候都搞唔掂班建制派議員,建制派議員同埋傳媒日日都叫佢落台。而家叫呢條廢柴決定邊度畢業嘅醫生可以免試進入香港,究竟會搞成點?如無意外應該係一鑊粥。

唔識教育但走去管教育嘅楊潤雄好勇武。教育局將有關國家安全指引發給學校,並要求小學生知道四種國家安全罪行。只可惜當楊潤雄被問到分裂國家罪及顛覆國家罪的刑罰是什麼,佢就話我唔係法律專家,亦唔係負責執行法律嘅官員,所以唔會答你呢個問題。更加表示國家安全教育要由小學開始做起,甚至話如果學校沒有制止學生叫危害國家安全口號,可能屬於沒履行責任,有需要甚至要報警。而家小學生學緊嘅嘢本來已經好複雜,遲啲仲要學埋國家安全,結果一係佢哋變成紅衛兵,一係個個走去做律師。不過前者嘅機會就高啲啦。至於教師幾時會畀 自己嘅學生批鬥呢?相信呢一日好快來臨。

要攬炒香港,一個林鄭月娥係唔夠嘅。林鄭月娥都有攬炒十部曲,呢個十部曲當然要有十兄弟幫手。陳肇始同楊潤雄當然榜上有名,其他八位兄弟就包括李家超、鄧炳強、鄭若驊、羅致光、邱騰華、聶德權、曾國衛同埋徐英偉。其他嘅問責局局長一樣喺後面搖旗吶喊。至於行政會議成員同埋立法會建制派議員亦都功不可沒。香港好快就會去到當年文革嘅年代,以後一人一本習語錄,子女批鬥父母,學生批鬥老師嘅日子好快就會來臨。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe