眾新聞 Logo
眾新聞 CitizenNews
眾說

We connect


林鄭月娥當年競選口號就係we connect 。繼兩年前成功團結香港人,兩年後嘅今日,林鄭月娥再次團結香港人。政府一星期前開始日日突擊封區,搞咗咁多場勞民傷財嘅大龍鳳,結果12次行動當中成功搵到一個個案咁大把(編按:最近一周數字是16次封區僅1宗確診)。而且政府仲打算新年之前繼續搞落去,根據呢個形勢,幾乎可以肯定林鄭月娥將會成功再次團結香港人。

眾新聞製圖

最初佐敦封區嘅時候,行動算係成功,起碼搵到13個確診個案,而且只係有一個阿叔打警察。不過繼續封落去,形勢即刻唔同曬。旺角有人高空擲物;馬鞍山有街坊激動到要瞓花槽,兩個居民企圖突破封鎖區,仲有阿叔接受電視訪問嘅時候鬧林鄭月娥食屎狗。點解最初行動尚算順利,然後形勢竟然出現急劇變化呢?好簡單,因為被圍封嘅地區唔同,而且市民眼睛係雪亮嘅。最初佐敦搵到13個個案,雖然比率唔高,但係總叫有丁點兒成績。之後搵到嘅確診個案連續多次捧蛋,你估仲有冇人相信政府抗疫成功,所以出現所謂嘅小區清零?過去幾日確診宗數反反覆覆,2月5日嘅數字竟然係整個星期最高,你話行動成功定失敗呢?

一個唔成功嘅計劃繼續搞落去,市民反抗是常識吧。而且最初圍封嘅地區,大部分居民都係劏房戶或者南亞裔人士,本身冇能力反抗,而且你送即食麵、午餐肉同口罩畀佢哋,的確可以雞髀打人牙骹軟。但係你走去封麗港城,然後送罐長城牌午餐肉畀佢,你估居民會唔會多謝你?麗港城居民心諗,我平時食開韓國午餐肉,長城牌我工人都未必食,就算出前一丁我都買日本版啦!馬鞍山恆安邨一樣,居民實力肯定比起佐敦劏房户雄厚,邊度得閒多謝你送幾罐罐頭畀佢哋食?而且香港有好多人都係黎生,佢哋嘅訴求就係返工。明明已經聽話做咗強制檢測,你仲要無端端走去封人哋棟樓,逼人做多次檢測,你估人哋會唔會唔反抗呢?如果黎生成為下一位受影響人士,唔知會唔會好似幾位阿叔一樣出手打人?

北角東發大廈封區強制檢測,林鄭到場巡視,只向記者揮揮手,沒有回答問題。

本來武漢肺炎疫情就係打殘香港人嘅最佳武器,點知從來唔輸得嘅林鄭月娥,竟然有方法反勝為敗,搞到香港人有機會再次we connect,就算當日唔支持罷工嘅黎生and friends,都分分鐘變成反政府份子,林鄭月娥你係得嘅。好希望有一日可以喺電視上再次見到黎生嘅英姿,睇下畀林鄭月娥搞到返唔到工或者放工返唔到屋企嘅佢,今次又有乜訴求,甚至係有乜嘢行動。睇睇鄭月娥係咪真係喺任期最後18個月,真正成功 we connect 700萬人。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe