眾新聞 Logo
眾新聞 CitizenNews
眾說

老海鮮可恥


世界上有一種人叫做老海鮮,最鍾意站在道德喜馬拉雅山,得閒無事批鬥班後生。左一句想當年,右一句而家班後生乜乜物物,一日到黑指指點點,唯恐天下不亂。醫學界都有一個咁嘅代表,佢嘅名叫李國章。李國章絕對係一個人才,因為無論佢擔任中大校長搞兩大合併、做教統局局長、擔任港大校委會主席負責處理副校長任命、定係擔任行政會議成員談論醫生註冊修訂條例草案,表現一樣咁出類拔萃,可以做到天下大亂。今次李國章呼籲本地醫生不應該自私,為病人著想,支持修例。嘩!李國章, 原來你係咁偉大㗎,覺得有人唔應該自私。李國章,我認同呢件事件的確唔應該有半點私心,如果唔係就真係等同閂埋門分餅仔。不過,最自私嘅究竟係邊個呢?會唔會係有仔女喺外國做緊醫生,想幫個女同女婿返香港做嘢嘅立法會議員呢?

圖片來源:商業電台

張宇人嘅女同女婿喺美國做緊醫生,但係張宇人講過佢哋兩個唔想考執業試,所以返唔到嚟香港做醫生。究竟佢哋兩個點解死都唔肯去考同醫科大學畢業試一樣水準嘅執業試呢?係因為懶、因為渣、定係其他原因呢?張宇人從來冇交代過,淨係知道明明係飲食界立法會議員嘅張宇人,次次講起海外醫生註冊條例修訂,就肉緊過講同飲食業相關嘅政策。講到尾,張宇人喺呢個條例修訂有重大利益衝突,因為只要放寬海外醫生註冊條例,佢嘅女同埋女婿就可以得益,偏偏張宇人喺今次註冊修訂條例草案就最盡力。一個既得利益者主導一個修例,唔知使唔使搵廉政公署介入一下呢?除此以外,究竟香港班醫生係咪好自私,冇為香港病人著想呢?如果要為香港人著想,究竟最低工資定係20蚊算唔算係為香港人著想?當日提議最低工資20蚊嘅張宇人,今日走去出盡全力支持醫生註冊修訂條例草案,咁樣究竟佢係為香港人著想,定係唔為香港人著想呢?我真係諗極都唔明。

入返正題講李國章。李國章叫本地醫生唔好咁自私,為病人著想支持修例,否則等同杯葛海外港人。等一等,上星期特區政府先至帶頭杯葛諗住拎BNO移民英國嘅香港人,不斷貶低諗住離開香港嘅香港人。一個星期後,點解作為行政會議成員嘅佢突然之間咁大愛,叫本地醫生唔好杯葛海外香港人呢?拎住BNO護照移民去外國就十惡不捨,分分鐘連本地居民身份都冇埋;而家喺海外工作嘅香港人當係寶,要大家唔好杯葛佢哋。媽,我好亂呀,係咪拎住英國護照嘅香港人就高一等,打算用BNO換取英國護照嘅就要盡全力歧視同杯葛,遲啲連人哋嘅香港居民身份同埋投票權都剝奪埋,唔好話想做醫生,做永久性居民都有難度。唔通好似譚耀宗個仔呢啲老早去咗外國嘅就 係貴賓,而家未出發嘅就要畀你清算?李國章介唔介意解釋一下,究竟乜嘢海外港人會被特區政府杯葛,有乜嘢海外港人會被特區政府優待呢?

究竟放寬相關條例修訂,真係為香港人著想?唔好傻啦,呢個條例究竟有幾吸引班海外香港人,你話呢?定係港區國安法趕客啲?香港要係咁好,香港人就唔使移民,特區政府亦都唔使一日到黑諗住點反制BNO 5+1移民計劃。人哋喺外國工作環境好咁多,做乜要返香港同你捱騾仔?如果香港真係咁好,有限度註冊計劃一早成功咗啦。 係人都知,今次註冊條例修訂,第一批得益嘅就係班富二代官二代。有個好爸爸幫你喺立法會破壞醫學界嘅專業自主,等你返到嚟香港唔使考試,跟住大直路入到去尊貴嘅私營醫療集團搵真銀,你話爽唔爽先?你班平民百姓就唔該同我留喺公立醫院巡房巡到天昏地暗冇得放工,呢啲就係叫做人生勝利組囉。

第二批得益嘅就係內地醫生。而家特區政府一日到黑叫你感謝中央,林鄭月娥真係好想班勾結外國勢力嘅港人第二代返香港?傻啦,人哋一早搭好過棚,諗住暗渡陳倉,引入內地醫生㗎喇。你估呢條條例討論到一半,會唔會有人走去話你哋批准海外畢業香港人返香港,唔畀血濃於水嘅內地醫生去幫手,係歧視緊內地人,可能違反國安法?跟住條例一路審議一路修改,到最後就好似武漢肺炎一樣,完成政治任務?

呢個醫生註冊修訂條例草案,你話冇政治任務,我就打死都唔信。過去兩年,請問特區政府有邊件事係冇政治考慮呢?武漢肺炎爆發初頭唔畀公務員戴口罩同埋叫香港人唔好戴口罩如是;全民自願病毒檢測如是;引入未夠臨床數據嘅國產疫苗如是;立亂封區搞到怨聲載道如是;今次呢條條例係咪木馬屠城記,結果好快就會揭曉,大家不妨拭目以待。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe