過去一年來，幾乎日日為大家報導疫情嘅衛生防護中心傳染病處主任張竹君，的確曾經有唔少人對佢有期望，只可惜亦有人認為佢只不過係一部錄音機。經過2月8號呢一單消息之後，我可以肯定張竹君上位有望。既然建制派咁唔鍾意陳肇始，叫佢落台，推張竹君做局長實在合情合理。呢單消息就係關於一宗聲稱本地感染個案。
呢單個案有幾特別？答案就係政治正確。呢個個案編號係10581，屬於一名39歲商務豁免人士。這名人士於1月21日曾經做病毒測試呈陰性，兩日之後由深圳返抵香港，1月30日感到頭痛，然後2月3日檢測呈陽性。同行返港一名家人亦確診；而於映灣園悅濤軒3期9座同住的3名家人亦告確診。張竹君聲稱由於患者病發前一週仍然在香港，所以列為本地個案。
等一等，等大家回帶睇一睇舊年12月5日另一間新聞先。廣東省衛健委公佈三宗境外輸入病例，其中一中來自香港患者於11月20日經香港珠澳大橋進入珠海並且接受醫學觀察，11月20及21日的檢測屬於陰性，但12月3日在隔離場所採樣檢測結果為陽性，所以廣東省衛健委將個案列為輸入病例。呢兩間新聞證實咗一件事，千錯萬錯都係香港嘅錯。就算武漢肺炎來自中國湖北省武漢，一年之後所有問題都從中國無關。所以呢一單13日後第三次進行檢測嘅個案，廣東省衛健委可以叫佢做境外輸入個案。相反，嗰一位由深圳返香港一星期之後出現病徵嘅商務豁免人士，肯定係香港本地感染個案，因為有人話大陸疫情非常穩定，甚至乎已經清零，所以不論係回港易定係商務豁免人士都可以透過一個病毒檢測陰性報告進入香港。然之後就算病發，總會有人搵到藉口，話你係本地個案，冇可能係內地輸入個案。因為根據國安法，內地係唔會有武漢肺炎個案嘅。
只要相關人士話去過旺角篤過一串魚蛋咁大把，相信張竹君都會說成喺旺角呢個高風險地區畀隔離唔知邊個隱形病患者傳染咗，一定係除非唔係。你試下話相關人士係內地輸入個案，睇下有冇人用國安法拘捕你吖喇！兩宗個案同樣涉及跨境人士，香港進入珠海就一定係香港人將病毒帶入去；內地人返香港就肯定係本地感染。講得出呢番說話嘅人政治智慧咁高，唔去做局長嘥曬。何況張竹君點都叫做係一個醫生，以佢過去一年面對傳媒嘅訓練，加上佢喺呢件事件入面咁政治正確嘅表現，張竹君肯定成為下屆局長大熱。
大家記住，回港易計劃好安全；武漢肺炎唔係來自武漢，大陸已經冇曬確診人士，成功做到清零。就算第四波疫情爆到2046都一定係香港人抗疫疲勞，新年走去拜年；肚餓走去食飯；冇錢走去返工；過海走去搭港鐵。千祈唔好話因為呢啲豁免個案搞到第四波疫情無限輪迴，因為所有人都可以鬧，除咗內地人唔鬧得。千錯萬錯都係香港嘅錯，鬼叫你做香港人咩！
