眾新聞 Logo
眾新聞 CitizenNews
眾說

進擊的肇始


連建制派都頂唔順嘅食物及衞生局局長陳肇始,去到年初一決定同全香港人開年。一個冇辦法讓香港人安心嘅安心出行程式,政府鼓勵市民用冇人去用,實在合情合理,因為張竹君都話暫時仲未透過安心出行應用程式追蹤到武漢肺炎確診個案。連好想上位嘅張竹君都畀唔到假消息去撐安心出行程式,陳肇始就反其道而行,表示強制業務處所要在場者使用安心出行程式將會加入法例599F規管。至於食肆,就算唔做晚市堂食,只要係開業嘅時候都必須要求市民用安心出行應用程式。未到赤口,進擊的肇始就首先同全香港市民開年,逼全香港人為咗食飯一定要下載安心出行應用程式,出賣自己嘅私隱。究竟陳肇始去到牛年點解變得咁進擊呢? 

陳肇始過去一年嘅表現有幾優秀,實在係有目共睹。就算連負責喺立法會做舉手機器嘅建制派都頂佢唔順,何君堯更加形容佢係一部壞咗嘅留聲機。一個連建制派都容忍 唔到嘅局長,帶領香港抗疫失敗是常識吧。但係陳肇始一去到牛年,即刻畀個進擊 mode你睇。究竟陳肇始喺牛年第一日受過啲乜嘢刺激呢,相信各位觀眾都好有興趣知道。

食肆同埋其他場所,已經畀陳肇始玩到得番半條人命,而家同你講年初七可以開番,不過就要所有食肆同埋場所全面配合,做埋警察嗰份,檢查所有食客有冇下載安心出行應用程式。張宇人,你對於醫療咁多意見,出句聲啦喂!究竟酒樓應該叫知客、侍應、掃地阿姐定係部長去檢查邊個食客冇用到安心出行應用程式呢?最緊要嘅係而家最低工資並唔係廿蚊一個鐘,又要計住有幾多個食客入場,入到場又要睇住佢哋有冇用安心出行應用程式,阿婆阿伯用平安鐘電話又要叫佢哋喺張紙寫低聯絡方法,然後發現支筆冇墨,或者阿伯唔記得帶副老花眼鏡出街,跟住阿伯頂唔順爆粗走人,真係多謝曬。唔通陳肇始以為自己智商同羅致光差唔多,既然羅致光都係做到一pat屎咁樣,不如透過強制全人類使用安心出行應用程式,增加香港就業率。不過陳肇始邊有咁聰明呢!

安心出行有冇用,我淨係知如果感染人士行得正企得正,怕乜嘢同你講佢去咗邊、食過啲乜做午餐、接觸過啲乜嘢人。除非相關人士去過建興大廈買羽毛球拍、去過美麗都大廈接觸唔知點解突然之間攞到行街紙嘅偷渡入境女子、或者好鍾意同小鮮肉跳老舞。不過,後三個爆發群組並唔係可以透過安心出行應用程式解決問題㗎。前兩者首先需要學雷鼎鳴話齋,叫鷄必須使用支付寶,咁樣你就可以分到邊啲人去建興大廈純粹係為咗買羽毛球拍,邊啲人去美麗都大廈純粹探親唔係叫雞。至於最後一個群組就難啲搞,亦相信陳肇始唔敢搞,如果唔係等收律師信啦你!所以話,陳肇始嘅進擊係冇用㗎,就算你令到全香港人人使用安心出行應用程式,兼且立法禁止打羽毛球,建興大廈群組依然繼續會出現,因為佢哋真係唔係去買羽毛球拍囉!


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe