眾新聞 Logo
眾新聞 CitizenNews
眾說

手足張建宗


世界上有一樣嘢好恐怖,呢一樣嘢叫做數字。只可惜世界上有一類人對於數字敏感度極低,結果隨時鬧出一個又一個笑話。好似張建宗咁,連續兩日表示安心出行程式下載數字屬於好指標,相關嘅數字最新係70萬。張建宗你真係好犀利呀,竟然用政府第二把交椅嘅身份確認咗香港藍絲人數, 唔通你真係手足?

安心出行應用程式,特區政府一日到黑鼓勵市民使用,但係下載數目自從舊年11月6號開始,一直徘徊在低水平。直到特區政府發茅,嚴格上強迫市民下載,如果唔係飯都唔畀你食,公務員返唔到工,下載數字先至達到70萬。張建宗竟然表示有關數字係好嘅指標,唔通你意思係香港只係淨返七十萬個藍絲?安心出行程式咁巴閉,冇理由藍絲唔排隊下載,係咪先?

想當年雷鼎鳴話香港有500萬寧沉默大多數,根據遊行人數KOL雷鼎鳴,計算方法就係750萬減200萬,所以藍絲數目應該有五百幾萬人。但係去到國安法簽名,得返三百萬人支持國安法,人數急跌四成。跟住去到全民病毒檢測計劃,人數再大跌四成得返唔夠180萬。去到今時今日安心出行應用程式,下載人數只係得70萬咋!

大家仲要記住,70萬人當中仲有好多係黎家軍,因為佢哋嘅訴求係返工,所以被迫下載安心出行應用程式進入政府部門。一句到尾,安心出行應用程式係政府大力推行嘅計劃,作為愛國愛港藍絲們,你哋點解得70萬人下載嘅?究竟係咪因為香港藍絲數目已經唔見咗八成有多,定係你哋根本唔愛國?你哋呢500萬人,簽個名支持國安法咁簡單已經唔見咗200萬人;免費畀你地做病毒檢測,又有120萬人失咗蹤;跟住只需要你哋用少少數據甚至係免費wi-fi下載嘅安心出行應用程式,然之後仲可以攞埋商場現金券同埋積分,點解得返70萬人嘅?你哋去咗邊呀,究竟係你哋個個染黃,定係一開始香港根本冇五百五十萬個藍絲呢?

張建宗成功突破盲腸,話畀大家知原來香港藍絲數目少到得人驚,七十萬人當中仲要扣除我嘅訴求就係返工嘅一部分人,究竟仲有幾多個人真心愛國愛港,所以下載安心出行應用程式呢?而家下載程式又有現金券又有商場積分,都唔夠一百萬人下載,張建宗仲表示係一個好嘅指標,究竟張建宗呢番說話嘅背後有啲乜嘢意思?唔通係話畀大家聽香港藍絲數目少得可憐,所以七十萬人下載政府都要感激流涕。可能張建宗真係手足,係我哋誤會咗佢啫。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe