眾新聞 Logo
眾新聞 CitizenNews
眾說

英國有幾差?


自從英國宣布BNO 5+1計劃之後,建制派日以繼夜,夜以繼日批評相關計劃,亦都不斷貶低英國同埋持有BNO護照嘅香港人。英國政府強推BNO居留政策,引起極大爭議。范徐麗泰接受《大公報》專訪時表示,英國受脫歐及疫情的雙重打擊,而香港卻可受惠於大灣區發展,「20年後香港的發展速度若快過英國20倍,我並不會覺得意外」,她呼籲有意移民英國者慎重考慮。係呀,英國真係好差㗎,千祈大家千祈唔好過去呀,千祈唔好好似李嘉誠咁樣大舉投資英國。就好似當年李嘉誠賣咗中環中心一樣,繼續唔好跟李嘉誠就啱㗎喇。

工聯會吳秋北叫李嘉誠做曱甴王。

工聯會吳秋北曾經叫李嘉誠做曱甴王,今日工聯會嘅郭偉強亦都話英國冇一個勞工組織好似工聯會一樣維護工人權益。所以愛國愛港嘅香港人千祈千祈唔好移民英國,就留返畀唔愛國愛港嘅黃絲跟隨李嘉誠步伐投資英國就好了。

李嘉誠究竟有乜嘢業務喺英國?包括其中一間英國最大配電廠- UK Power Networks,覆蓋倫敦、英格蘭東南部及東部,約為英國四分一的電力分銷市場;英格蘭地區污水及食水服務公司Northumbrian Water Group Limited;英國八大配氣網絡之一Northern Gas Networks;英國布里斯托市發電企業Seabank Power發電廠;英國三大鐵路車輛租賃公司之一UK Rails Group;三個位於英國的港口- Port of Felixstowe,London Thamesport,Port of Harwich;英國釀酒廠及英式酒館營運商Greene King。現時英國三成天然氣市場、三成電力市場、還有5%的供水都是由長和系控制。仲有一個位於泰晤士河附近、面積相當於九個維多利亞公園嘅大型地產項目Convoys Wharf,計劃提供3500個住宅單位。既然工聯會咁憎李嘉誠,叫香港人唔好移民英國合情合理。只不過香港亦都好多人相信李嘉誠。既然係咁,愛國愛港嘅一班記得記得記得唔好移民英國,費事同吳秋北口中嘅曱甴王同流合污。

只不過李嘉誠嘅眼光的確比大部分香港人優勝,當年高價賣走電訊公司Orange、香港甲級商廈市道最旺盛嘅時候買走中環中心都算係近年嘅神級操作之一。究竟香港人應該信工聯會定係信李嘉誠,自己諗啦。你覺得自己聰明過李嘉誠,你咪走去接火棒收購中環中心囉。或者同佢唱反調李嘉誠大舉投資英國,你有權沽空長江系股票或者買相關熊證。既然散戶喺美國都贏到大戶,我都好有興趣睇工聯會點樣喺股票市場打贏李嘉誠。

究竟英國好唔好,其實我同你都答唔到,因為我哋呢一刻都係香港生活。不過投資的話,你會相信李嘉誠定係日日唱衰英國嘅建制派呢?李嘉誠未必次次啱,不過有幾多個人贏過李嘉誠,有幾多個人數得出嚟呢?係呀,英國係好差呀,所以電能實業同長江基建股價都跌到低位。不過呢邊廂有人話英國好差,李嘉誠同家族成員就不停增持長江系股票,今次呢究竟邊個會係最後贏家,你估下啦。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe