眾新聞 Logo
眾新聞 CitizenNews
眾聞

【安心出行】先登記後入座 食肆門口人頭湧湧 黃店憂客人資料外洩拒開晚市


今日起客人掃「安心出行」或填寫個人資料,食店方可恢復四人一桌及晚市堂食至10時。有餐廳憂客人資料外洩,亦質疑登記資料對防疫的成效,寧願放棄開放晚市,不要求食客留資料或掃安心出行。記者午飯時段走訪多間食肆及酒家,有年輕人稱不欲下載「安心出行」,寧自己下廚,有長者則稱不擔心使用程式洩漏私隱問題。也有不少人抵達食肆門口,才下載應用程式,導致店家門口人頭湧湧。

有餐廳堅持不開放晚市,以免食客要掃安心出行,「榮少喇沙」是其中之一。餐廳門口貼上「為慶祝年初七,我哋晚市不設堂食」,午市時段大量年輕食客在門外輪候。

榮少喇沙是堅持不開放晚市的餐廳之一,午市時段大量年輕食客在門外輪候。黎卓欣攝

負責人阿榮質疑推行「安心出行」的成效:「疫情已經回落,點解仲要登記先可以恢復晚市呢?唔想執行政府唔知有冇效,但又要交香港人資料出去嘅政策。」

 「榮少喇沙」原址在天水圍,屯門分店剛在去年12月尾開張。阿榮坦言,當初計劃新店會主力做堂食生意,晚市是主要收入來源之一,不過開張時已碰上晚市禁堂食,現時每晚平均只有20張外賣單。被問到會否擔心長遠難以營運,他苦笑說:「我一開舖就已經冇得堂食,邊有錢賺?會擔心嘅,不過相信香港人都習慣咗6點後無堂食,依家夜晚又唔係完全無單,都支持到嘅。」

餐廳門口貼上「為慶祝年初七,我哋晚市不設堂食」。黎卓欣攝

早前有餐廳列出不恢復晚市的黃店名單,呼籲市民支持,會否擔心對其他黃店造成壓力?阿榮說應該多予體諒:「如果真係專做夜晚生意,餐廳都冇辦法,真係需要開返晚市先營運到,例如酒吧咁樣,都體諒嘅。」

陳小姐在附近工作,順道買外賣。她質疑「安心出行」應用程式所需權限太多:「其實佢唔需要咁多資料,但又要拎咁多權限,覺得係喺背後做緊啲嘢,唔想畀市民知。」她又批評,政府要求餐廳須登記客人資料才能恢復堂食,如同威脅餐廳就範。

另一位等候堂食的陳小姐則稱未有下載安心出行:「我有我嘅自由,唔想畀人知我去過邊,科技嘅嘢越方便,就越危險。」她說,自己未有到美容院或健身的習慣,日後亦會特意光顧不恢復晚市的餐廳,以表支持。「要down(安心出行)寧願唔食,幫襯其他餐廳,或者自己煮。」

快餐店常客持舊型號手機: 次次填咁又麻煩咗啲

有快餐店門口設服務站及廣播,提醒顧客要先登記、後入座。填寫資料包括,姓名、電話、到訪日期及時間。進入餐廳後,須自行對摺放入紙箱。

店員著撐著拐杖的何伯伯掃描二維碼,他只能從口袋掏出舊型號、只具通話及短訊功能的手機,「我呢部無得整呢啲…」店內放了4部無人使用的電子點餐機,不過何伯伯卻選擇走到櫃檯前排隊點餐。他選了最近的空位坐下,放下剛購買的飽餐,斟了一杯熱水,向記者展示那部比手板還細小的舊手機。

何伯伯向記者展示只具通話及短訊功能的舊手機。黎卓欣攝

他語氣帶點自豪地說,自己是快餐店的常客,昨日已有看電視新聞,「我知!今日開始要登記吖嘛!」但得悉以後每次進入餐廳都要登記資料,反問記者:「唔係淨係填一次咩?咁又麻煩咗啲…」

另亦有顧客在店外即場下載「安心出行」,60多歲的王女士稱不擔心有資料外洩問題:「方便啲!每次都咁樣填好麻煩!後生就驚個人資料啫,我哋唔怕,做錯事先驚畀人知資料。」不過十分鐘後,她仍未成功進入餐廳,錯過了早餐時段,並向職員求助:「個app轉咁耐都未download到嘅!」

酒家亦恢復四人一桌,顧客進內前須掃描「安心出行」或先填表格,留下姓名及電話。黎卓欣攝

酒家亦恢復四人一桌,顧客進內前須掃描「安心出行」或先填表格,留下姓名及電話。接待處前站滿高舉手機的茶客。有茶客對放寬社交距離措施感到欣喜:「我哋成日都嚟,四人好啲,可以一齊食。(每次要填資料麻煩嗎?)唔麻煩,佢要咪畀佢囉,留個電話啫。」也有老茶客不知如何下載「安心出行」:「Playstore即係點?邊個『公仔』先係?」他看著電話螢幕有點焦急:「唉!等吓囉,等唔到就留電話,唔係點?」




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe