眾新聞 Logo
眾新聞 CitizenNews
眾說

人類補完計劃?


由聶德權、陳肇始兩位局長親自到機場恭迎科興疫苗運送抵港。香港電台影片截圖

第三期臨床數據完成咗都仲未成功喺醫學期刊刊登嘅國產科興疫苗終於強勢抵達香港啦!衛生署衞生防護中心轄下疫苗可預防疾病科學委員會和新發現及動物傳染病科學委員會舉行聯席會議後,認為科興疫苗適合60歲或以上長者接種,稱科興第一、二期數據已證明,疫苗安全、能誘發免疫力。疫苗可預防疾病科學委員會主席劉宇隆稱60歲或以上嘅人,應該可以打。呢隻叫大家感激流涕嘅國產疫苗,60歲以上人士嘅效果可以用神奇、頂級超卓來形容,因為95%可信區間下限竟然係負數,即係話理論上打咗隻疫苗分分鐘仲衰過唔打。睇到呢個數據,你係咪覺得好興奮呢?究竟呢個計劃係疫苗接種計劃,定係人類補完計劃呢?

科興疫苗得唔得,唔係靠估,亦都唔係靠愛架,而係靠數據,完成咗研究都唔夠膽投稿去國際醫學期刊,原因係啲乜,你懂的。政府專家顧問、港大醫學院院長梁卓偉表示,兩劑科興疫苗相隔28天接種有效率是六成多,若計及誤差,所謂95%可信值的上下限,下限過不到世衛指明的30%。連政府自己人嘅梁卓偉提及疫苗整體成效都講到咁,60歲以上人士你仲夠唔夠膽打科興疫苗呢?

科興疫苗。

科興隻疫苗假假哋喺第三期臨床研究都搵咗四百幾人參加,偏偏研究結果真心估你唔到。但係香港疫苗專家委員會成員竟然話60歲以上人士應該可以打。係嘅,大部分60歲以上人士都唔識得睇乜嘢叫做95%可信值,大部分都係睇完電視新聞人云亦云,有幾多人會真心撳入去科興疫苗嘅初步數據,睇清楚每一字每一句呢?平民百姓唔識英文唔識科學唔出奇,但係就算專家個個都好似財演一樣,有人畀壓力話無論如何國產疫苗都要進入香港,見到科興提供嘅數字如此恐怖,竟然仲夠膽話「60歲或以上嘅人,應該可以打。」講呢番說話嘅所謂專家,有幾多個係憑良心講出相關說話,有幾多個擘大眼講大話?

科學嘅嘢好簡單,就係有圖有真相。你能夠將研究結果畫成一幅可以令人信服嘅圖,其他人咪相信你囉!如果搵咗四百幾人做研究,結果研究做出嚟嘅95%可信區間闊到令人難以置信,你仲夠膽叫班老人家接種疫苗,唔通你真係相信祖國所有嘢都係美好,所以信政府唔怕,呼籲班長者唔需要相信科學,繼續接種科興疫苗?

喺呢一刻,我突然諗起2016年嘅天水圍林太。林太對於專家嘅見解果然係好有見地。 所謂嘅專家去到關鍵時候,竟然唔相信科學,要大家憑感覺接種科興疫苗。咁不如各位專家建議大家睇龍珠抗疫好過啦!反正兩者都完全唔科學,睇龍珠至少唔會有副作用,而且李居明都算係玄學專家。究竟今次嘅疫苗接種計劃最後會唔會變成人類補完計劃,香港因此平均年齡大減,我真係冇眼睇。一隻疫苗得定唔得,專家都唔相信科學, 咁香港市民可以點做去到最後可能都係回歸基本步,年初一裝頭炷香、年初三去車公廟轉下風車實際啲,至少無傷大雅,唔會做完之後瓜咗。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe