眾新聞 Logo
眾新聞 CitizenNews
眾聞

失業劏房戶拒借失業貸款:都係要還 有人批邏輯荒謬籲反擊:買iBond放咗佢賺幾舊


今年財政預算案未有回應民間設立失業援助金的訴求,改為推出失業貸款,上限借8萬元;同時亦未有派錢,改為派發$5,000元電子消費券,更要分五期發放,最快要等到暑假才開始接受登記。其他派糖措施亦縮水,包括沒有公屋免租一個月、只多發半個月綜援等。基層及失業人士又點睇?有失業人士表明會借盡8萬元貸款,先用來抽iBond,再買公用股收息,「話畀政府聽我哋用腦思考,佢荒謬,我哋合理應對。我相信冇一個國家嘅政府會叫人失業嘅時候借錢!」

政府擬推出失業貸款,上限借8萬元。資料圖片

【$5,000元電子消費券,啱唔啱洗?】

陳女士與丈夫及兒子3人住在80尺劏房,每月最大支出是$3,600租金以及膳食開支。消費券初步設計分5個月發放,每月發放1,000港元,並設有1個月期限,陳女士認為不設實際,「其他咩都可以慳啲洗,我好少買其他嘢,如果我嗰個月買唔到係咪冇咗?電子嗰啲交租、水電費都唔得,我情願佢直接派$5,000畀我,佢畀現金我哋都可以用嚟交租。

現職司機的陳先生亦覺得政府直接派錢更好,「而家淨係電子消費券都冇咩用啦,一日一個午餐都唔夠啦。你$1,000一個月,除開平均一日30幾蚊,食個午餐都40幾蚊啦。係叫做好過冇,我情願佢直接派錢好啲啦,我點樣用都得。」

他認為今次預算案不合格,「又唔派錢,(派糖)又縮水,你呢個時間縮水,增加我哋壓力。呢個時候應該派多啲錢畀人先啱嘛。」本身住公屋的他,不滿政府在市民最艱難的時期派糖縮水,「而家啲人失業仲多,你政府而家仲縮水,感覺唔合道理」。他指,公屋戶及綜援人士是最需要幫助的群組,「最好好似往年咁,綜援補返一個月,你半個月爭得幾多?綜援係最需要嗰啲人嚟,你又縮咗水。」

【失業貸款,借定唔借?】

預算案又提出貸款計劃協助失業人士,由政府提供擔保,讓失業人士向銀行申請貸款,貸款額可達月薪6倍,上限8萬元,年息1厘。

陳女士丈夫本來做廚房,去年受疫情影響,只能間中接廚房、地盤替工,自去年12月起一直未有工開,而她則在家照顧6歲兒子,目前一家三口靠積蓄過活。她說,應該不會申請失業貸款,寧願政府直接發放失業援助金,「借人哋啲錢,都係唔係幾好,因為借咗要還,如果搵到嘢做、有工開就唔洗借你筆錢啦,慳啲洗就得,唔洗成日諗幾時要還嗰筆錢。」

本來任職旅遊巴司機的陳先生,由前年9月一直失業至去年11月才找到工作。他認為預算案對基層的幫助不夠,不滿沒有推出失業援助金,「我哋旅遊巴司機,失業咗一年有多,捱到而家,失業援助金又唔畀。」

失業人士批政策荒謬:借盡8萬,先抽iBond再買公用股收息

從事傳媒工作多年的陳先生,近月因個人理由辭職,因本身有積蓄而沒有太大經濟困難。他批評失業貸款政策荒謬,無法幫到有需要的人,「人哋失業需要援助,你叫人借錢,即係愈借愈窮,呢樣嘢唔合邏輯。就算畀唔到錢,如果你已經諗消費券,點解唔將失業援助例如換成超市劵呢啲,起碼解決到日常基本開支,較實際。」

他表示會借盡8萬元,先用來抽iBond,之後再買公用股收息,「我咪用你個制度囉,大家借盡佢。借返嚟第一件事就買iBond,之後透過銀行即日上市放咗佢,根據經驗每年都會賺到幾百蚊,將政府唔肯畀你嘅嘢,用iBond賺返返嚟先啦。第二件事,應該拎嚟買中電,而家4厘息,8萬蚊正常計一年有$3,200息,一年後到時咪還返畀佢,咁做係無聲抗議,亦係實際幫到自己。」他覺得大家應用此制度「抗議」,作合理投資,「話畀政府聽我哋用腦思考,佢荒謬,我哋合理應對。任何形式嘅幫助,都唔應該用借款……相信冇一個國家嘅政府會叫人失業嘅時候借錢!」

財政司司長陳茂波出席電視論壇時被問到,失業貸款計劃是否「阿茂整餅」,他回應指失業貸款並非取代短期失業援助,而政府早前已解釋不推出失業援助的原因。陳茂波說,由於現時失業率高企、市民生活困難,因此政府「提供多個選項」供市民考慮,「個別有市民有困難嘅,如果提供多個選項畀佢揀,都值得咁嘗試。」




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe